Højskolernissamut tapiissutit atorunnaarsinneqarnissaat Atassummit isumaqataaffigineqarpoq
Taava sooq siunnersuutip partiip siulittaasuata isornartorsiugaa Atassummiit taaseqataaffigineqarpa?
Atassutip siulittaasua Gerhardt Petersen ima akivoq:
- Isumaqarpunga apeqqutit tassuunga attuumassuteqanngitsoq. Suliassat ataatsimiinnissamut nassiussuunneqartarput, Inatsisartunullu ilaasortat peqatigalugit taakku peqataaffigisarpakka, Atassutip siulittaasua Gerhardt Petersen oqarpoq. Naalakkersuisunut ammasumik allagaqaammini højskolersinnaanissamut tapiissutit atorunnaarsinneqarnerat taassuma akuersaarnartinngilaa.
Tapiissutilli peerneqarnissaat Atassutip nammineq taaseqataaffigaa. Aningaasanut inatsisissamut allannguutissat Inatsisartut Aningaasaqarnermut Ataatsimiititaliaanni aappassaaneerneqarmata allannguutissatut siunnersuutit katillutik 53-iupput.
Aappassaaneerneqarnissaanut isumaliutissiissummi atuarneqarsinnaavoq Atassut sinnerlugu ataatsimiititaliami ilaasortap Finn Karlsenip allannguutissatut siunnersuut taaseqataaffigigaa.
Paasissutissat taakku Gerhardt Petersenip ima oqaaseqarfigai:
- Aningaasanut inatsit tamakkiisoq Atassumminngaanniit akuersaanngilarput, tassanilu ilaatigut ilaavoq højskolinut tapiissutit peerneqarneri, Gerhardt Petersen oqarpoq.
Tassa aningaasanut inatsit tamakkiisoq Atassummit akuersaarneqanngilaq, højskolersinnaanissamulli tapiissutit peerneqarnissaannut siunnersuut Atassutip Inatsisartuni Aningaasaqarnermut Ataatsimiititaliami ilaasortaatitaata siunnersuut taaseqataaffigaa, siiulittaasua allatut isumaqartoq.
Aningaasanut inatsit 2010-moortoq suli akuerineqartinnagu, immikkoortunit 22-usunit 14-it illuatungiliuttut akuersaarpaat.