Høgni Hoydalip CIA pillugu oqallinneq iluarisimaarpaa
- Oqallittoqareermat danskit tusagassiuutaasa pisimasoq sammivaat. Tassalu Folketingimi oqallitsitsinerup siunertaa - tassa qanoq iliortoqarneranik Danmarkimi inuiaqatigiit paasitinnissaat. Tamannalu iluatsittutut oqaatigisariaqarpoq, minnerunngitsumik pisimasoq eqqartorneqartillugu Kalaallit Nunaata inissisimanera ersarissarneqarpoq. Pisimasut misissorneqarnissaannut tamakkua apeqqutaassaqimmata, maanna angusagut naammaginnarallarpakka, taama Høgni Hoydal KNR-imut oqarpoq.
Paasissutissanik nutaanik saqqummiisoqannginnera Høgni Hoydalip aamma nikalluallaatiginngilaa.
- Pisimasut ukua pillugit naalakkersuisullu 2005-imili oqallittuartarnikuuvugut. Siullermillu susoqarsimannginerarlugu oqarfigisariarluta, naggataatigut misissuititsisoqarnissaa akuereriarmassuk pasisatsitut pisoqarsimanersoq pisoqarsimannginnersorluunniit oqaatigisinnaanagu oqarput. Tamanna pasitsaassatsitut pisoqarsimaneranik nassuernertut uanga isigaara, Høgni Hoydal oqarpoq.
Taanna aamma isumaqarpoq, Folketingimi oqallittoqarnerani illuatungiliuttut siullerpaamik pisimasoq pillugu isummersuutimik saqqummiunnissaannut periarfissinneqarmata, tamanna pingaartutut isigisariaqartoq.
- Maannakkut oqallinnerup takutippaa, Danmarkimi naalakkersuisut taarserneqarpata pisimasoq pillugu qulaajaatitsisoqarnissaa ilimagisinnaassagipput, Høgni Hoydal oqarpoq.
Taanna aamma suli isumaqarpoq, pisimasoq arlaannaannulluunniit attuumassuteqanngitsunit qulaajaaffigineqartariaqartoq. Folketingimili sisamanngormat qulaajaanissaq itigartinneqarmat Kalaallit Savalimmiormiullu Naalakkersuisuisa danskit naalakkersuisui kimigiiserfigalugit piumasaqaateqarnerisigut aatsaat qulaajaasoqarsinnaassasoq ilimagaara, Høgni Hoydal oqarpoq, maannakkullu Juliane Henningsenituulli nunaminni naalakkersuisut qisuariarnissaat utaqqiinnalerlugu.
