Høgni Hoydal: Keermiaa skakkernermi naasorissaasutut atorpaatigut

Den Nordatlantiske Gruppep Folketingip nunanut allanut ataatsimiititaliaanik tallimanngorpat ataatsimeeqateqarnermini CIA pillugu nutaanik paasisaqarnissani ilimagivallaanngilaa. Savalimmiormiut Folketingimut ilaasortaatitaat, Høgni Hoydal, Gruppe sinnerlugu ataatsimeeqataasussaq taama oqarpoq. Folketingimili ammasumik apeqqarissaarnissaq isumalluarfiginerullugu.

- Danskit naalakkersuisa paasinerluisoqarsimaneraanissaat uanga ilimagaara. Aamma ilimagaara oqassasut, aperisimagaluarlutik paasissutissanilli tunineqarsimanatik. Folketingimili apeqqarissaartoqarnerani Ministeriuneq Nunanullu allanut ministeri pisortatigut tamanut oqaaseqartariaqassammata tamanna isumalluarfigineruara, Høgni Hoydal oqarpoq.

- Misilittakkakka naapertorlugit soqutiginartoqartillugu Folketingip nunanut allanut ataatsimiititaliaaniit oqarfigineqartarpugut pineqartut isertuunneqartariaqartut. Ukualu pisimasut pillugit pisortatigoortumik arlaannik oqartoqarsimavoq allarluinnarnilli amerikamiut pisortaat oqarfigineqarsimallutik. Folketingip Nunanut allanut ataatsimiititaliaanik matoqqasumik ataatsimeeqateqarnitsinnit Folketingip ataatsimiittarfiani ammasumik apeqqarissaartoqarnerani paasisaqarnerusinnaanerput ilimagineruara, Høgni Hoydal oqarpoq. Pisimasullu assut isumakulunnartoqartinnerarlugit.

- Inatsisit nunat tamalaat akornanni atuuttut aammaasiit unioqquteqqinneqarsimasut Danmarkimiillu sorpajuttut sakkugineqarsimasugut paasisavut naapertorlugit ilimanarluinnarpoq. Susoqarsimanera qulaajartariaqarparput, demokratiimi naapertorlugu ingerlatsitsiviusumi pisimasut illersorneqarsinnaanngillat.

Savalimmiormiut Kalaallillu Folketingimi ilaasortaatitaat arlaleriarlutik CIA-p silaannartatsinni timmisartuussisarsimanera pillugu apeqqutilliisareersimammata, maannakkut saqqummiussat isumakulunnartorujussuartut taasariaqarput, Høgni Hoydal oqarpoq.

- Allaammi inatsisit nunat tamat aalajangersugaat naapertorlugit iliortoqarsimanersoq apeqqutigigaangatsigu danskit naalakkersuisuisa tamakkua oqaaseqarfigerusuttarnikuunngilaat. Kingusiinnaali paasivarput, danskit naalakkersuisuisa amerikamiut pisortaat allaanerujussuarmik kiinnerfigalugit attaveqaqatigisarsimagaat. Taamatut iliornerit Kalaallit Nunaanni Thulemi pisimasut pillugit pissusilersorsimanernut assigupput tassa Kalaallit Nunaat pisortatigoortumik arlaannik paasissutisseriarlugu pisortaqarfiit susassaqartut allat allarujussuarmik iliuuseqarfigisarlugit, taamatut pissusilersorneq akuerineqarsinnaanngilluinnartutut uanga isigaara, Høgni Hoydal naggasiivoq.

CIA-p timmisartuisa Kalaallit Nunaannut mittarsimanerisa saniatigut, aamma Savalimmiut Islandillu silaannartaatigoortarsimanerat Islandimullu aamma mittarsimanerat uppernarsineqareerput.