Hækkerup: SAR-i pillugu isumaqatigiinniarneq nukingiupparput
Aappaagu januaari aallaqqaataata kingorna SAR-i qanoq ingerlanneqassanersoq, qallunaat illersornissaq pillugu ministeriata, Nick Hækkerup-ip Nuummut ullaaq tikinnera iluatsillugu, KNR-imit aperaarput.
- Ministeriaqarfiit tamatumunnga attuumassuteqartut peqatigalugit isumaqatigiissut maanna suliarineqaleruttorpoq. Nalunngilaralu tamatuma ingerlanneqarnera statsministerimit aammami tusagassiortunit soqutigineqarluni alaatsinaanneqartoq. Taamaattumillu suliassaq tamanna qanittukkut naammassineqartariaqarpoq. Oqaatigisinnaavarali isumaqatigiinniarnermi aaqqiissutissanik nassaarniartoqarpoq, tassami annaassiniartarneq isumannaallisaanerlu eqqarsaatigalugit aaqqiissuteqartariaqaratta, Nick Hækkerup taama oqarpoq.
Taanna aamma aperaarput isumaqatigiinniarnerit sorpiaat maanna isumaqatigiinniutaanersut.
- Isumaqatigiinniartut siunertaraat ukiup uuma naannginnerani naammassineqarnissaa, tassami piffissaq imaalereerpoq, taamaattumillu tamanna nukingiunneqartariaqarluni, tassami ujaasinerit annaassiniartarnerillu isumannaatsumik aaqqinneqartariaqarput, Nick Hækkerup oqarpoq.
Illuatungeriilli isumaqatigiissummik naammassinninnissaannut nukinginnarsivoq, tassami qaammatit marlussuit qaangiuppata isumaqatigiissut nutaaq atuutilersussaavoq.
- Isumaqatigiinniarnerni illuatungeriit tamarmik kissaatigigunarpaat tamassuma iluamik aaqqinneqarnissaa qangali naammassineqarsimassagaluartoq. Sooq taama kingusitsisgisukkut isumaqatigiiniarnerit ingerlanneqarnerannut pissutaaneruvoq, periutsit nutaat atorneqalersussanngornerat, Nick Hækkerup oqarpoq.
Qulimiguullit S 61-it annaassiniarnernut ujaasinernullu atorneqartartut Nunattalu silaanut tulluuttutut oqaatigineqartartut, januaarip aallaqqaataaniiit atorunnaarsinneqarpata allanik taarserneqassanersut, Nick Hækkerup aperaarput.
- Qulimiguullit S 61-it januaarip aallaqqaataani atorunnaarsinneqartussat taartissaat eqqarsaatigalugit, taakku isumannaatsunik allanik taarserneqarnissaat siunertaraarput. Taamaattorli qulimiguullit sorliit atulissanersut suli maannamut oqaatigisinnaanngilara sulimi isumaqatigiinniarnerit naammassineqanngillat, qallunaat illersornissaq pillugu ministeriat, Nick Hækkerup taama oqarpoq.
Annaassiniartarnerit isumannaallisaanerillu eqqarsaatigalugit januaarip aallaqqaataata kingorna annaassiniartarnerit isumannaallisaanerillu tamakkiisumik atuutilersinneqarnissaat imaaliallaannaq neriorsuutigisinnaannginnerarpaa.
