Hvideruslandimi qinersinermi peqquserluttoqarsimavoq

Hvideruslandimi præsidentimut ippassaq qinersinermi inernerusut perulluliortitsilerput, qinersinermi peqquserluttoqarsimaneranik pasitsaassisoqarmat.

Qinersinerup inernera imaappoq maannamut Præsidentiusoq Aleksander Lukasjenko qinersisartut 82,6 procentiinit taaguunneqarami præsidentitut ingerlannassaaq.

Hviderusland Europami kisermaassilluni aqutsiviusut amiakkuattut taaneqartarpoq. Jeppe Kofoed Danmarkimi Socialdemokratit oqaaseqartitaat oqarpoq Hvideruslandimi qinersineq peqquserluttuliorfigineqarsimasoq.

- Hvideruslandimi qinersinermut atatillugu qinersisartunik isumasiuisoqaqqusaasimanngilaq. Qinersiviit iluamik isumannaarlugit qajannaarneqarsimanngillat nakkutigineqaratik sumilu tamaani inissitsiterneqarsimallutik.

Hvideruslandimi qinersinermik EU-p nakkutilliisitaasa qinersinermik naliliinertik ualeru saqqumiutissavaat. Hvideruslandimi qinersinermi OSCE-p piumasaqaataanik malinnittoqarsimanngitsoq, præsidentimullu illuatungiliuttut ikiortaallu katillugit 400-it qineqqusaarnerup nalaani parnaarunneqarsimasut, qineqqusaarnerullu nalaanni tusagassiuuteqarfinnut attaveqattaaliorneqarsimasut, EU-p nakkutilliisitaasa saqqummiutissagaat Jeppe Kofoed oqarpoq. Illuatungiliuttut qineqqusaarutaat aserorterneqartarsimapput ataatsimiititsiniartarnerilu unitsinneqartarsimallutik, OSCE-llu tamanna saqqummiunniaraa Jeppe Kofoed oqarpoq.