Hvideruslandimi akerliussutsimik takutitsineqarpoq
Hvideruslandip illoqarfiisa pingaarnersaanni Minskimi inuit 10.000-t missaanniittut Lukasjenkop nunamik aqutseqqilerneranut atatillugu akerliussutsiminnik ullumi takutitsipput.
Akerliussutsimik takutitsineq sakkortusineqarpoq tutsiummat illuatungiliuttut siuttuata aappaa Aleksander Kosulin tigusarineqartoq. Russit nutaarsiassaqartitsiviata Itar-Tass-ip tigusarinninnermik tusarliussinermini oqaatigaa Kosulin inuit allat untrititikkaat parnaarussiviup silataani akerliussutsimik takutitseqatigitillugit tigusaasimasoq. Parnaarussivimmiipput Lukasjenkop præsidentinngoqqinneranut qinersinermullu qanittumi pisumut atatillugu akerliusut.
Hvideruslandimi naalakkersuisunut illuatungiliuttut siuttuat alla Aleksander Milinkevitj akerliussutsimik takutitsisut nalunaaquttap akunneri marluk qaangiummata eqqissillutik angerlaqquai, ima oqaasertalerlugu: -Takutereerparput annilaanganata. Ajugaassaguttali amerlanerusariaqarpugut, Milinkevitj oqarpoq.
