Hussein piumasaqarpoq Irakimi aqutsisut uppitinniarneqassasut

Saddam Hussein-ip Irak-imi kisermaassilluni naalakkersuisuusimasup tullersortigisimasaalu, Irak-ip ullumikkut aqunneqarneranik nunanut arabiamiuusunut uppititsiniaaqqusillutik pikititsinianillu tapersersueqqusillutik piumasaqarput.

Nunat arabiamiut 22-it naalakkersuisuisa Sudan-imi ataatsimeeqatigiinnissaat aqagu aqaguagulu ingerlanneqartussat sioqqutilaarlugit, Irak-imi aqutsisuusimasut marluk taama peqqusipput, arabiamiut akornanni avissaartuuttoqalernissaa siunertarisorineqarluni.

Saaffiginnissutit Husseinimit tullersortaanillu pisuusimanersut suli uppernarsineqanngikkaluarpoq. Paasiniaaqqissaarnerilli takutippaat Irakimi naalakkersuisunik uppititsiniaanissaq pikititsinianillu tapersersueqqusineq Saddam Husseinip oqaaserisartagaanut pissuserisartagaanullu assingusut.

Saaffiginnissutit imarisaanut tunngatillugu allaqqasoqarpoq, massakkut Irakimi pisut eqqarsaatigalugit, Amerikamiut Israelimiullu ataatsimoorlutik anguniaraat Irakimi avissaartuuttoqalernissaa, Iranimi shia-siortut iluaqutigisinnaasaannik.

Husseinip tullersorterisimasaa suli tigusaanngitsoq, immiussamik tv-qarfimmut aamma nassitsisimavoq. Tassani arabiamiunut peqqusivoq pikititsiniat Irakimi kisimiillutik unioqqutitsinatillu aqutsisuunissaanik akuersaarnissaannik kaammattuuteqartumik. Arabiamut Iraki suleqatigiumajunnaassagaat aamma piumasarivaa, massakkummigooq aqutsisui pinerluttuummata kilitsissiaallutillu.

Kisermaassillutik aqutsisuusimasut saaffiginnissutaat marluk arabiamiunit tusaajumaneqarsimanngillat, akerlianilli piumasaqarsimapput Iraki piaartumik naalakkersuisuliornissaa, sakkutuut Irakimit piaartumik qimagunniassammata.