Hussein-imut eqqartuussineq eqqissiviilliorfiuvoq

Irakip kisermaassilluni naalagarsuarisimasaata Saddam Husseinip eqqartuunneqarnerata aallarteqqinneqarnerani pissanngatigineqalerpoq aaqqissuussaasumik pilersaarusiukkamillu Saddam Hussein naalliutitsisitsisarsimanersoq paasinarsiumaarnersoq.

Irakip naalagarsuarisimasaata Saddam Husseinip eqqartuunneqarnini arlaleriarluni kinguaattoortereeraalu ullumi aallarteqqinneqarpoq.

Eqqartuussivimmut iserpoq taattuloqaluni tungujortumik qallersaateqarluni, qaavatigullu jakkeqarluni.

Eqqartuussivimmut isiinnavilluni oqaatsinik illernartuunngivissunik eqqartuussisini, U.S.Allu præsidentia George W. Bush appisaluuppai.

-Killuussisut perloqquakka, George Bush perloqquara, muamaakkormiut naalagaaffiat inuummersorli.

-Erseqqissaatigaalu unnerluussaaqatinilu arfineq-marluk pinngitsaalisaallutik eqqartuussiviliaanneqarsimallutik.

Killisiorneqartut eqqartuussinermi najuutinnassappata illersuisuata piumasaraa eqqartuussisoq unnerluussisorlu taarserneqartariaqartut. Ullumi Saddam Husseinip eqqartuunneqaatigaa 1982-imi muamaakkormiunik shiasiortunik 150-inik toqoraasitsisimanini.

Eqqartuussineq naammassiartuaartillugu Saddam Husseinip qanimut suleqatigisimasaasa killisiorneranni neriuutigineqarpoq naalakkiutigineqartarsimasut kimit pisarsimanersut paasinarsiumaartoq.