Husky Energy suli Sisimiunut soqutiginnippoq
Husky Energy Sisimiunut tikeraaqqippoq ilaatigullu umiarsualiviup allilerneqarnissaanut pilersaarutit qimerluuataarlugit. Canadamiut suli soqutigaat qillerivinnut pilersuinermik Sisimiuniit aallaaveqartinnissaa. Tamanna atuarneqarsinnaavoq Qeqqata Kommuniani kommunalbestyrelsep ataatsimiissutissaani.
Husky Energy pilersaaruteqarpoq 2013-imi Sisimiut avataanni misileraalluni qilleriniarluni kissaatigaallu umiarsualiviup pilersuivittut atorneqartup qillerivimmut sapinngisamik qanittumiinnissaa. Canadamit periarfissap aappaatut Aasiaat qimerluuataareerpaat Sisimiut umiarsualiviat 2013-imi allilerneqarsimassanngippat.
Sisimiuni umiarsuliavik kittaarlugu allilerneqassasoq naatsorsuutigineqarpoq, allissutissaalu siulleq nukiginnartumik suliarineqarsinnaavoq Canadamit soqutiginnissappata.
- Suliffeqarfiit arlaat umiarsualivimmik attartornissamik pilersaaruteqassappat, assersuutigalugu allissutissap aallaqqaataani, Sisimiuni umiarsualiviup allilernissaanik suliaq siuartinneqarsinnaavoq, Qeqqata Kommunia allappoq.
2013-imi misileraalluni uuliasiornissaq Sisimiuni inuussutissarsiuteqarnermut sunniuteqartussaavoq. Husky Energy kommunimut ilisimatitsivoq sulisut 1.000-it 1.200-ut missaat ukiumi qilleriffiusumi ataatsimik atorneqassasut.
Umiarsualivik tassani ulapaarfiussaaq atortut angisuut oqimaatsullu nunaminertamik annertuumik pisariaqartitsissapput toqqorsivittut atorneqartussamik.
Husky Energyp naatsorsuutigaa misileraalluni qillerineq juunimiit septemberimut ingerlanneqassasoq.
Uuliasiortoqalernera Qeqqata Kommuniani kommunalbestyrelsip ileqquusumik ataatsimiinnerminni februaarip 28-it oqaluuserissavaa.