Hurtigruten Issittup Imartaanut angallassisalerniartoq

Norgemiut umiarsuaatileqatigiiffiata Hurtigrutenip, Issittumi sumiiffinnut assigiinngitsunut angallassisartup, soorlu Nunatsinnut, Islandimut Svalbardimullu, Issittumi angallassisarnini annertusarnialerpai, Russimmi Issittup Imartaani qeqertaannut Franz Josef Landimut angallassisalerniarpoq.
Assi © : Graham and Dairne/Flickr Creative Commons
Allattoq Mads Lynge
februaarip 07-at 2018 08:52

The Barents Observerip nittartagaani tamanna atuarneqarsinnaavoq.

Umiarsuaatileqatigiiffiup Hurtigrutenip umiarsuaatai Ruslandimi illoqarfiit ilaannit Murmanskimit Franz Josef Landip tungaanut aappaagu 2019-imi angallassisalissapput. Umiarsuaatileqatigiiffiup 2019-imi angallassinissanut pilersaarutaani tamanna atuarneqarsinnaavoq.

Qeqertat Franz Josef Land avinngarusimasumiinnertik pissutigalugu umiarsuarnik maannamut tikikkuminaattarsimaqaat, umiarsuilli sikunik aserorterutaatigisut atorlugit tikikkuminarnerulerput.

Umiarsuaatileqatigiiffik Poseidon Expeditions, umiarsuaatileqatigiiffinni maannamut kisiartaalluni Franz Josef Landiliartitsisartuuvoq, Hurtigrutenimiilli aappaagumit unammillerteqalissaaq, Aurora Expeditionsimiillu 2020-mi aamma unammillerteqalissalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq