"Hurtigruten" akiliisinnaajunnaarataannaavoq

Norgemi umiarsuaatileqatigiiffik, Hurtigruten ASA, umiarsuaq takornarniartaat, ”Fram” peqatigalugu Kalaallit Nunaanni aasaanerani sinersortartoq, aningaasatigut kingumut ajornartorsioqqilerpoq. Umiarsuaatileqatigiiffik, Norgemi Radio, NRK, naapertorlugu, 186 millioni koruuninik ukioq manna maannamut amigartooruteqareerpoq, siorna 2007-imi ukiup affaa siulleq suli tikinnaguluunniit 34 millioni koruuninik amigartooruteqarsimalluni.
aggustip 26-at 2008 17:12

Umiarsuaatileqatigiiffiup pisortaanera, Olav Fjell, oqarpoq, uuliap akiata qaffakkaluttuinnarnera, umiarsuaatileqatigiiffiullu Norgep sineriaani kiffartuussinissamik Norgemut isumaqatigiissutaa amigartoornermut pissutaasoq. Norgep sineriaani kiffartuussinissamut naalagaaffik aningaasanik tapiisarpoq, piumasaqaataavorli Hurtigruten Norgep sineriaani ukioq naallugu angalassasoq. Isumaqatigiissulli taanna aningaasarpassuarnik amigartoortitsivoq.

Aningaaserivimmi SpareBank NordNorgemi nalilersueqqissaartartoq, Bjørn E. Kristiansen, naapertorlugu, umiarsuaatileqatigiiffiup Hurtigruten ASAp ukioq manna 2008-mi amigartoorutaasa, norskit aningaasai malillugit, 400 millioni koruunit qaqingajalerpai, naalagaaffimmullu isumaqatigiissut allanngortinneqanngippat umiarsuaatileqatigiiffiup akiliisinnaajunnaarnissaa ernummatigaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq