Hundested Knud Rasmussenimut katersugaasivittaarusuppoq
- Takuniaasut ukiut tamaasa amerliartorput. Taamaammat Knud Rasmussenip illuani inissakilliartorpugut. Knud Rasmussenimut tunngasut tamakkiisut oqaluttuarerusukkaluarpagut, illulli angissusiata tamanna ajornarnerulersikkiartorpaa, Søren La Cour Jensen oqarpoq.
Tassalu taamaammat Hundstedimi illoqarfiup qiterpasisssuani inissisimasumik Knud Rasmussen pillugu katersugaasiviliornissaq sinnattorivaat, ajornanngippat umiarsualivimmi Nunatsinnut isikkiveqartutut takorluugassanngorlugu.
- Knud Rasmussenip illua eqqissisimanartuuvoq, itinerusumik paasiniffissaqqilluni, taamaanneralumi iluatigarput. Kisianni katersugaasivimmi filminik, assinik allakkanillu assammik allatanik takutitsisinnaalerusuppugut. Taava inuttaata pissusia pillugu oqaluttuarsinnaanngussaagut, ilisimatuussutsikkut suliarisimasarujussui ilanngullugit. Taamaalillutalu maanna ajornakusoortitaraluatsinnik, takuniaasut tamakkiinerusumik oqaluttuussinnaalissavagut, katersugaasivilerisoq oqarpoq.
Knud Rasmussenip katersasa ilarpassuisa toqqorsivinniit saqqummersinnissaat, katersugaasiviliornikkut siornertaavoq - ilaat Knud Rasmussenip illuaniipput aammali Naalagaaffiup Katersugaasivissuaneersunik saqummersitsinissat neriuutaapput. Aamma fladskærminik, skærminit toorlugit aquttakkanik seqertittaatinillu pilersuinissaq takorluugaavoq.
- Imartuumiik paasissutissiisinnaalissagutta, paasissutissiinermut atortorissaarutit nutaaliat pigisariaqarpagut. Tamakkualu Knud Rasmussenip illuanut naleqqutinngillat. Katersugaasivimmili nutaaliami atortut tamakkua kusanassaqaat, Knud Rasmussen pillugu allaanerusumik paasiniaanermi atorneqarsinaasut, Søren La Cour Jensen naliliivoq. Knud Rasmussenillu puigorneqannginissaa, taassuma pingaartippaa:
- Uummannatoqqami niuertarfiliornermigut Kalaallit Nunaata ullumikkut ataatsimoornissaanut aalajangiisuulluinnarsimagami, nunap oqaluttuassartaanut nutaanerusumut sunniuteqarsimaqaaq. Danskit Kitaata avannaarsua akisussaafigerusussimanngilaat, Knud Rasmussenili uteriiserluni niuertarfiliorpoq, taamaalillunilu danskit erfalasuat Avanersuarmi napparneqarpoq, Søren La Cour Jensen oqaluttuarpoq.
Aamma Tunumut piginnittussaaneq pillugu Nunat tamalaat eqqartuussivissuanni Den Haagimi 1932-mi eqqartuussisoqarmat, Knud Rasmussen Danmarkimut iluaqutaasumik ilisimannittutut oqaluppoq. Tassalu Norge ajorsarpoq, Nunatta avinneqanngitsoorneranik kinguneqartumik.
