HTX-imi taamatitsiinnartarneq pinaveersaarniarneqarpoq
Meeqqat atuarfiini atuartut ilinniarnertuunngorniarfinnut ingerlaqqissagunik pitsaanerusumik siunnersorneqartariaqarput.
Taamaattumik Sisimiuni Teknikkikkut Ilinniarnertuunngorniarfik isumasioqatigiissitsinissamut ullumi aallartittussamut qaaqqusivoq, meeqqat atuarfiini atuartut siunnersorneqartarnerat oqaluuseritinniarlugu.
Ullut marluk ingerlaneranni siunnersuinermi periaasissamik suliaqartoqassaaq.
Ilaatigut siunertarineqarpoq ilinniartut siunnersorneqarnermikkut kukkusumik toqqaannginnissaasa anguniarneqarnissaa, taamaalilluni HTX-imi aallartikkaluartut unitsitsiinnartartut ikilisinnissaat ilaatigut aqqutissiuunniarlugu. Tamatuma saniatigut ilinniarnertuunngorniarfinni ilinnialersunut piumasaqaatigineqartartut ilimagisallu sammineqassapput.
Siorna Sisimiuni HTX assingusumik isumasioqatigiissitsivoq. Taamani aalajangiunneqarpoq HTX-imi ilinniartut Meeqqat atuarfiini atuartunut anginernut siunnersortitut atorneqartassasut, tassa ilinniartutut inuunertik atuarfinnut oqaluttuariartortassagaat. Ukiormanna ilinniartut 40-t sinerissami paasisitsiniaaqataapput.
