Hoteliutilitoqaq napparsimavimmut CT scannerimik tunissuteqarpoq

Dronning Ingridip napparsimavissua nutaarsuarmik CT scannereqalissaaq. Nunatsinni ukiorpassuarni namminersorluni suliffeqarfiuteqartoq hoteliuteqartorlu Svend Junge tunissuteqarmat. CT scanneri, qinnguartaat nutaaliaq inuk tamakkerlugu qinnguartaasinnaasoq 7 millioni koruuninik naleqarpoq. Svend Jungep tunissuteqarnini ima tunngaveqartippaa:

- Taamatut tunissuteqarninnut pissutaavoq uanga nammineerlunga kræftimik nappaateqarnera. Inuillu kræfteqalersut Danmarkimut scannertikkiartorlutillu katsorsartikkiartortarput.

Svend Junge aperaarput sooq Dronning Ingridip Napparsimmavissuanut 7 million koruuninik tunissuteqarsimanersoq imalu akivoq:

- Qaammatini sisamani nakorsanit katsorsartereerlunga akuerineqarama nunatsinnut angerlarpunga. Piumaffigineqarpungali kemoterapii atorlugu katsorsartinnera nangeqqissallugu. Tamannali pitinnagu scannertittussaavunga paasiniarlugu qanoq sakkortutigisumik nakorsaasersugaassanerlunga.

Scannerip iluaniitillunga anangajavippunga quingajavillungalu. Scannerimit anipallassinnarlunga aquippunga tamatumalu kingorna nakorsap oqaluttuuppaanga scanneri qangarnissaasoq.

Namminneq taarsernissaa anguniarlugu qinnuteqartaraluarlutik akineqartarsimapput akissaqartinneqanngitsoq taamaalimmallu nammineq tunissutitut scannerimik pisiumallunga neqeroorpunga.

CT scannerissaq atorfissaqarluassasoq tunissuteqartorlu assut qujassuteqarfigisariaqartoq, Dronning Ingrid-ip Napparsimmavissuani peqqissaasut ningiuunerat Majbritt Andersen oqarpoq. Scannerip timi kittaarlugu misissortarpaa. Majbritt Andersen oqarpoq tunniussaq pisoqqamit nutaaliaanerullunilu 64-riaammik pisinnaasaqarnerusoq. Taamaalilluni nappaatinik suussusersiniarneq sukkanerulissaaq utaqqisarnerillu sivikinnerulissallutik. CT Scannerissap aappaagu, januaarimi februaarimiluunniit tikinnissaa naatsorsuutigineqarpoq.