Hotelimi pisortaq: Pujortarnikinnerulernissaq pillugu suliniutit iluaqutaasinnaapput

- Pujortaqqusinnginneq takornarianit pingaartinneqartartoq naatsorsuutigineqartartorlu maluginiartarparput, pingaartumik takornariat nunani avannarlerneersuugaangata, Erik Bjerregaard oqarpoq.

Taassuma pujortarnikinnerulernissamut politikkeqalernissamik isuma tapersersorpaa.

Hotel Arcticimi nerisoqarnerata nalaani pujortartoqaqqusaanngilaq,

nalunaaqutaq unnukkut qulingiluat tungaanut tamanna atuutsinneqarluni.

Pujortartut neriniartarfiup initaata ilaanni nalunaaqutaq qulingiluat kingorna pujortarsinnaatitaalersarput, pujortartarfik silaannarissarluagaq tamatumunnga pilersinneqarnikuummat.

Pujortarnikinnerulernissaq pillugu inatsisissatut siunnersuutit marluk Inatsisartuni ullumi oqallisigineqassapput.

Inuit tamat ornittagaanni immikkut pujortartarfeqarnissaa Doris Jakobsenip Siumumeersup siunnersuutigaa, aamma kikkulluunniit ornittagaanni pujortaqqusinngilluinnarnerup atuutilernissaa Juliane Henningsenip Inuit Ataqatigiinneersup siunnersuutigalugu.