Hotel Sisimiut 30 miliuuninit takuneqarsinnaanngorpoq
Nunarsuarmi akunnittarfinnut innimiinniisarfiit siuttuat booking.com Hotel Sisimiunit suleqatigineqalerpoq. Nittartagaq taanna suliffimmut atatillugu angalasunit takornarianillu 30 miliuuninit qaammammut iserfigineqartarpoq.
- Nittartakkami tassani oqaatsit 40-t atorneqarput, tamanna aamma Kalaallit Nunaata internettimi nittarsaanneqarneranut nukittorsaataalluarpoq, inniminniinissamullu pisariillisaataalluni, Hotel Sisimiuni pisortaq Anette Lings oqarpoq.
- Saqquminerulernerput aasaanerani inniminniissutinik amerlisaanermut iluaqutaalluarsinnaavoq, minnerunngitsumik nunarsuup sinnerani pissutsit assigalugit nittartagaq aqqutigalugu inniminniisalernissaq piffissanngorpoq, Anette Lings oqarpoq.
Unnuinissamik inniminniisut aamma timmisartumik misigisassanillu assigiinngitsunik inniminniisalernissaat siunissami pilersaarutaasoq Anette Lingsip oqaatigaa.
