Hotel Hvide Falk unammillertiminit pisortassarsisoq

Akunnittarfik tusaamaneqarluartoq piginnittuisa akunnittarfik suliffeqarfissuarmut Albatrosimutjanuaarip aallaqqaataat aallarnerfigalugu tunimmassuk akunnittarfik nutaanik piginnittortaarpoq. Piginnittut nutaat Edvard Rosbach akunnittarfimmi pisortassatut toqqarpaat.

Pisortanngortoq suliffimminit nikikkuni nikingaarnavianngilaq. Taanna Hotel Arcticimi aamma Ilulissaniittumi ullumikkut suliffeqarpoq. Rosbach akunnittarfimmi tassani ilaatigut inniminniinermut, ataatsimeersuarnernut saaffiginnittarfimmullu pisortaasimavoq, siunissarli nutaanik unammillernartoqassaaq.

- Hotel Hvide Falkimi aallartinnissara qilanaaraara, akunnittarfimmi Albatrosimilu sulisut suleqatiginissaat qilanaaraara. Neriuppunga atuisartut naatsorsuutaat soorlu kiffartuunneqarluarneq Ilulissanilu puigunaatsumik misigisaqarnissat tunniussinnaajumaarigut, tusagassiutinut nalunaarummi allappoq.

Hotel Hvide Falkip siulersuisuisa Ilulissani akunnittarfimmi pisortassartaarneq nuannaarutigaat.