Hotel Arcticimut nersornaasiineq nuannaarutigineqaqaaq

Nunatta imartaani nunataanilu uumasut, naasut paarnallu atorluaraanni nersornaammik angisuumik tunisittoqarsinnaavoq. Tamanna Ilulissani akunnittarfiup Hotel Arcticip igasuisa ullumi takutippaat.

Nunap pissarititaanik atorluaanermikkut Hotel Arctic nunani avannarlerni neriniartarfiit nuimanerpaat allat qaangerlugit Nunani avannarlerni 2009-mi nerisassiullaqqiffiunerpaatut, 100.000 koruuninik aningaasartalimmik, akissarsitinneqarpoq.

Igasut talitik quleralugit ullumi nuannattupilussuusut, 2006-imili igasuusoq Jens Jørgen Schmidt Reimer oqarpoq.

- Assut tupannarpoq siullermik, kisianni qummut qaffarsarpaatigut igasaratta kalaallit igaassaataannik igariaatsikkut nutarteriutigaluta, Hotel Arcticimi igasoq oqarpoq.

Jens Jørgen Schmidt Reimerip assersuutigaa puisip neqaa atorlugu suaasaliamik nutarsaasimanertik.

- Puisip neqaa, naatsiiat, suaasat uanitsullu ataatsimut qalaartinnagit, immikkut suliaralugit puuguttamulli immikkoortitaarlugit sassaalliutigisarnerat assut neriartortut mamarisaqaat.

Hotel Arctic nersorniarneqarpoq nunatta pissarititaanik atorluaasarnermigut.

- Kuannit, paarnat tupaarnat, kalaallit pissarititaat assigiinngitsorpassuit nerisassiuutigisarpavut. Nutaatut eqalussuaq, soorunamilu puisip neqaa, neriniartarfinni allani atorneqanngitsoq uagut atorluartarparput, Jens Jørgen Schmidt Reimer nuannaarpaloqisoq oqaluttuarpoq.

Neriniartarfinni allani atorneqarneq ajortunik nutaaliornissartik pingaartippaat. Hotel Arcticilu sisamanik tallimanillu ullorialerneqartoq ingalluni avataanit isiginiarneqarnermigut qaffaallappoq.

- Tunutsigut immitsinnut pattalaarpugut nuannaaqaluta aamma nuannaarnerput annerulerpoq maani igasutut ilinniartoq allagartartaarmat, Jens Jørgen Schmidt Reimer.

Hotel Arcticip igasuisa ilaat iganermik unammiartorlutik aallaqqammermata nersornaasiineq sulisut suli nalliussissanngikkallaraat aamma oqaatigineqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat