Hotel Arctic 2020-mi 15,2 millionit koruuninik 2019-imit angusakinneruvoq. Assi: KNR/ Christine Hyldal

Hotel Arctic coronap ajornartoortitsineranik amigartooruteqarujussuartoq

Akunnittarfissuaq coronap ajornartoortitsineranit kalluarneqaraluaqaluni ukioq manna siumukaqqillunilu siulersuisui malunnaatilinnik ilaasortaqalernermikkut patajaallisarput.

Hotel Arctic ukiuni arlaqartuni taama angusaqartiginikuunani 2019-imi sinneqartooruteqarluareerluni 2020-mi amigartooruteqangaatsiarpoq.

Akunnittarfiup naatsorsuutaani siornarnitsani tamanna erserpoq.

2020-mi 15,2 millionit koruuninik 2019-imit angusakinnerulluni 9,2 millionit koruuninik amigartooruteqarpoq.

Nunatsinni suliffeqarfiit takornarialerinermik aallussallit ilarpassuisulli coronap ajornartoortitsineranit kalluarneqarpoq.

Akunnittarfissuup aqutsisoqatigiivi pisortaalu piginneqatigiiffiup ukiumoortumik naatsorsuutaani ima allapput:

- 2020-mi angussangatitavut angoqqajanngilagut. Pikkorissaanissarpassuugaluit ataatsimiininissarpassuugaluillu taavalu ininik inniminniinerpassuugaluit covid-19-ip nunarsuaq tamakkerlugu tunillaassuutileriasaarnerani taamaatinneqarput.

Hotel Arcticip kaaviiaartitai 57 procentinik taamanikkut ikilipput, 28,5 millionit koruuniullutik.

2021-mi angusaqarnerussangasut

Akunnittarfissuaq coronap nunarsuaq tamakkerlugu tuniluunnerani ammaannaavippoq aammali nutarterneqalerluni.

Nunarsuup sinnera takornarianut 2020-p ilarujussuani matoqqasoq, aamma erserpoq. Akunnittarfimmi init 48 procentii akunniffiusimapput, taakkunanngalu 54 procentii nunatsinneersunit, 39 procentii Danmarkimeersunit 7 procentiilu nunanit allaneersunit akunniffiusimallutik.

Akunnittarfilli siornarnit angusaqarnerussangatikkitsik, aqutsisoqatigiit allapput.

- 2021-mi siornarnit kaaviiaartitaqarnerussangatipparput. Covid-19-illi tuniluunnera kalluaammat 2019-imisulli kaaviiaartitaqartigissasorinngilarput. Ilulissanilu akunnittarfiit akornanni unammilleqatigiinnerusoqalingajalertoq, naatsorsuutini allaqqavoq.

Akunnittarfittaassarsuaq Hotel Ilulissat qanittukkut ammartussaq assersuutaavoq.

Siulersuisui malunnaatilinnik ilaasortaqalertut

Taamatuttaaq piginnaasaqarluartut, tassa Danmarkimi immiorfimmik Mikkellerimik piginnittoq pilersitsisorlu, Mikkel Borg Bjergsø, taavalu Hotel Føroyarimik piginneqataallunilu tassani pisortaq, Johannes Jensen, Hotel Arcticip siulersuisuini ilaasortanngorput.

Ilulissani Hotel Arcticip siulersuisuisa siulittaasuata, Jacob Nitter Sørensenip, tamanna nuannaarutigaa.

- Mikkelleri immiaaqqanik asseqanngitsunik akunnittarfimmi sassaalliisarnitsinni suleqatigereerparput, aamma Mikkel Johannesilu ilaatigut Savalimmiuni neriniartarfimmi Koksimi, Michelinimik ilisarnaasikkami, suliarilluakkanik nerisassiornermik misilittakkaminnik aamma avitseqatigisassavaatigut. Piginnaasaat akunnittarfimmi mittarfissuaqalernissatta tungaanut ineriartortitseqqinnissatsinnut pisariaqartippavut, taanna tusagassiuutinut nalunaarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat