Hotel Arctic allisarneqalerpoq
Hotel Arctic, Ilulissaniittoq, millionerpassuit nalinginik allisarneqartussanngorpoq.
Quleriinnut pingasunut agguataakkanut 33-nik initaassaaq, aappaaguagulu, tassa 2008-mi, juunip qaammataani ammartussamik ataatsimeersuartarfittaassalluni.
Hotel Arctic-imi pisortaq Erik Bjerregaard taama oqarpoq.
Hotel Arctic Air Greenlandimit pigineqarpoq, pilersaarutillu akuerineqareerput.
Pilersaarutit kommuniminngaanniit akuerineqarnissaat tullinnguuppoq, tamannali ukiap ingerlanerani pisinnaassasoq ilimagineqarpoq.
Illup uigua Qajaq-mik atilik 2000-imi allisarneqarpoq, taannalu talleqqinneratigut inissat 33-t pilersinniarneqarput. Illup uigua Umiaq-mik atserneqareerpoq.
Ataatsimeersuartarfissaq Hotel Arctic-ip isaaffiata eqqaani inissinneqassaaq.