Hospicemik pilersitsinissamut isumaq taperserneqarpoq

Nunatsinni piartortunut immikkut napparsimaveqalernissamut siunnersuut Inatsisartuni siullermeerlugu oqaluuserineqaqqammerpoq. Tarnip pissusaanik immikkut ilisimasallip Niels Peter Aggerip piartortunut hospiceqalernissaa pisariaqartinneqartoq oqaatigaa. Peqqissaasut Kattuffiani siulittaasoq isumaqataavoq.
oktobarip 16-at 2012 10:49

Nunatsinni sivisuumik napparsimareerlutik piartortut atugarisaat artornarsinnaasarput. Piartortut angerlarsimaffigisaminni pisortaniit iluamik ikiorneqaratik ilaatigut toqusarput, imaluunniit toquliivinnerminni napparsimavimmut unitsinneqartarlutik. Ukiumut kalaallit 100-ut qaangerlugit Danmarkimi Rigshospitalimi toqusarput. 

-Peqqissaasut Kattuffiata siulittaasuatut isumaqarpunga Kalaallit Nunaanni hospicemik neqeroorut pisariaqartinneqartoq. Inuit amerliartuinnartut kræfteqalertarput, katsorsaneqarsinnaanngitsumik napparsimalertarlutik. Piffissaq kingulleq artornarsinnaasartoq nalleraangat ilaqutaasut qutsavigineqartussanngoraangata neqeroorutigineqarsinnaasutuat ilagaat napparsimavimmut unitsinneqarneq, taama Inuuti Fleischer naqissusiivoq.

Piartortunut napparsimavik hospiceq Nuummi inissinneqassappat Kalaallit Nunaata avannaani tunumilu  najugaqartunut hospicemi toqujartorusuttunut ajornartorsiutinik nutaanik pilersitsissaaq, soorlu nunatta isorartunera pissutigalugu piartortunut ilaqutaasut piartortup najornissaanut periarfissaat killeqassammata.

- Inuit hospiceqarnissamut isumaq paasiuminaatsissavaat, piartortoq asasaq naggataasumik ataatsimooqatigiilluni najorneqarsinnaanngippat. Piartortoq hospicemiinnerani ilaqutaasut sumi najugaqassappat, siumut utimullu angalanissaq qanoq akissaqartissavaat? Nunatsinni hospiceliornissaq aaliangiunneqassappat taakku tungaatigut ajornartorsiutit annertoorujussuanngorsinnaapput, Inuuti Fleischer isumaqarpoq.

Hospicemi sulisunik naleqquttunik sulisussaqarnissaq aamma ajornartorsiutinngorsinnaavoq. Piartortut napparsimavianni hospicemi sulisussat immikkut piginnaasallit pisariaqartinneqartarput, soorlu nakorsat peqqissaasullu immikkut piartortunut napparsimavimmi sulisinnaasut. 

- Innersuunneqarsinnaapput soorlu peruluttunut peqqissaasut peqqissaasullu sinitsitsisartut. Uanili pingaaruteqarpoq erseqqissassallugu hospicemi peqqissaasutut sulineq immikkuullarilluinnarmat. Soorlu Hospice Søholm-imi peqqissaasoq oqarneratut:  ”Hospicemi peqqissaasutut sulineq ilinniarneqasinnaanngilaq, inuup imminermi pigereertariaqarpaa!” Nakorsaqarniarnerup tungaatigut aaqqissuteqartoqarsinnaavoq nakorsamik sammisamut uunga soqutiginnittumik pissarsinikkut, Inuuti Fleischer knr.gl-imut oqarpoq.