Immikkoortoq nutaaq, Dronning Ingridip Napparsimmavissuaniissaq, nunatsinnulli angalasassasoq, siunnersuummi akuerineqartumi allassimavoq.Assi: Jonas Løvschall-Wedel

Hospice taamaatinneqartoq: Napparsimaruluttunilli katsorsaasarneq pitsanngorsarneqassaaq

Napparsimasut ajorunnaarsinnaanngitsut toqujartorfissaannik, tassa hospicemik, siunnersuut inatsisartunit itigartinneqarpoq. Napparsimaruluttunulli katsorsaasarneq isumaginninnerlu pitsanngorsarneqassasut politikkerit toqqarpaat.

Napparsimasut ajorunnaarsinnaanngitsut uninngavissaannik, toqujartorfissaanilluunniit, hospicemik taaneqartartumik sanaartortoqassanngilaq.

Tamanna Inatsisartuni upernaakkut ataatsimiinnermi aallartinneqaqqammertumi aalajangerneqarpoq.

Pinartumilli nappaatilinnut Nuummi, Dronning Ingridip napparsimmavissuani immikkut ittumik katsorsaasoqalernissaa politikerit aalajangerpaat.

Immikkoortumi siunnersuineq nunattalu sineriaanut angalalluni peqqinnissaqarfiup suliaqarneranut inerisaaneq pingaarnermik suliassarineqassapput, taakkuuppummi inunnik assersuutigalugu toqussutaasinnaasumik nappaassuarmik kræftimik napparsimasunik pitsaanerpaamik paaqqutarinnittussat.

AAMMA ATUARUK Nutserinerlunneq siunnersuinerlunnerlu: Inuit tamakkuninnga peqqinnissaqarfimmi nalaataqartarput

Matumanilu Savalimmiuni suleriuserineqartoq assingusoq 2005-imi pilersinneqartoq isumassarsiorfigineqarpoq.

Immikkut ittumik ukkataqalernissamut aningaasat atorneqartussat 4,5 millionit koruunit missaaniittut, Ilaqutariinnermut Peqqissutsimullu Ataatsimiititaliap naatsorsuutigaa.

Coronap ajornartorsiortitsinera kinguarsaataasinnaasoq

Illoqarfiit annerit ilaanni hospicemik pilersitsinissamik isumassarsiarineqartoq 2012-imi suliarineqalerpoq.

Tassanilu nunatsinni toqqutaasartumik napparsimasut qanoq pitsaanerusumik ikiorserneqarsinnaalernissaat misissuiffigineqalerluni. Napparsimasut qanoq pitsaanerusumik ikiorneqartalernissaat ujartorneqartoq 2014-imi aamma 2015-imi nalunaajaammi takuneqarsinnaavoq.

Napparsimasut ajorunnaarsinnaanngitsut toqujartorfissaannik pilersitsisoqassappat 70 millionit koruuninik naleqartussaagaluarpoq, ingerlatsinermullu ukiumut 16 millionit koruuninik akeqassalluni. Taassuma saniatigut napparsimasut ilaqutaasullu angallannissaannut aningaasartuuteqartoqartassalluni.

Coronalli ajornartorsiortitsinera immikkoortumik pilersitsinissamut kinguartoortitsisinnaasoq Naalakkersuisut erseqqisaatigaat.

- COVID-19 maannakkut nunarsuaq tamakkerlugu tunillaassuuttoq taassumalu aningaasatigut kingunissai pissutigalugit, annertuumik aningaasartuutissat 2021-mi piviusunngortinnissaanut ajornakusoornissaat nassuerutigisariaqarparput, naalakkersuisut allapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat