Hormoninik allisaaterpassuit tillinneqartut

Hormonit allisaatit 90 millioner koruunit sinnerlugit nalillit tallimanngormat tillinneqarput. Sukasaatit atorneqarneri akiorniarlugit suliniaqatigiiffimmi, Anti-doping Danmarkimi allaffeqarfiup pisortaa, Finn Mikkelsen oqarpoq hormonit allisaatit nunarsuarmi ima piumaneqartigisut allaat ikiaroornartunit piumaneqarnerulersimallutik.

Pinerlunniaqatigiit mafiameersut nunani arlalinni sukasaatinik assigiinngitsunik anngiortumik tuniniaaneq ingerlappaat, Danmarkimili annerusumik rockerinit tamakku tuniniarneqartarput. Paasisat naapertorlugit nunarsuaq ataatsimut isigalugu hormonit allisaatit tuniniarneranni iluanaarutaasartut ikiaroornartup tuniniarnerani aningaasatigut iluanaarutigineqartartunit amerlanerusut. Taamaammat rockerit Bandidosineersut sisamat Novo Nordiskip nakorsaasiorfianni tallimanngormat tillitaat nalikitsutut taaneqarsinnaanngillat, ippassarli tillinniaqqikkaluaramik tigusaapput. Mafiap rockerillu hormoninik allisaatinik soqutiginninnerujussuisa ilimageriikkavut piviusunut naapertuuttut naqissusiinnarpaat; tassalu nunarsuarmi hormonit allisaatit piumaneqartorujussuusut, ukiullu marlussuit matuma siorna naatsorsukkavut naapertorlugit 96 milliardi koruunit naligi ukiumut tunineqartarput. Inuillu pisisartut 15 millioniuppata imatut agguataarsimaneri ilimagaagut; timersortartut 5 millionit, eqaarsaarluni nukittorsartarfinniittartut 5 millionit 5 millionillu isiginnaartitsisartut, qatserisartut allallu assigiinnitsut pissutigalugit nukittunerorusuttut ilaat, Anti-doping Danmarkimi allaffiut pisortaa Finn Mikkelsen oqarpoq.

Aviisimi Ekstra Bladetimi allaaserisat naapertorlugit rockerit sisamat tigusarineqartut ulluni pingasuni tigummigallagassanngortinneqarput.