Inuppassuilli assersuutigalugu imerniartarfimmiikkaangamik kiinnamut assiaqutsit taakku peertaraat, allaallumi imigassartorsimatillutik imminnut qanittuaraasartut, Carrie Lamip aamma oqaatigaa.Assi: Isaac Lawrence/AFP/Ritzau Scanpix

Hongkongimi imigassanik sassaalliisinnaajunnaarallassasut

Inuit imigassartorsimatillutik imminnut qanittuaraasartut, Hong Kongimi siuttup Carrie Lamip oqaatigaa. Taamaattumik imigassamik sassaalliineq killilersorneqassaaq.

Imigassanik aalakoornartulinnik neriniartarfinni imerniartarfinnilu sassaalliisarnerup unitsinneqarallarnissaa, Hong Kongimi eqqarsaatersuutigineqarpoq.

Hong Kongip politikkikkut aqutsisua, Carrie Lam ataasinngornermi taama oqarpoq.

 

Takornariallu pigasunngornermiit ullunilu 14-ini tulliuttuni Hong Kongimut takornariarsinnaassanngitsut taassuma saniatigut ilisimatitsissutigaa. 

Hong Kongimi oqartussat: Kiinnamut assiaqutsit iluaqutaapput

Hong Kong, Kinami nunap ilaanut Guangdongimut killeqarfeqartoq, nualluutip coronavirusip tuniluutilernerani annerusumik suli eqqorneqarsimanngilaq.

Innuttaasut anersaartuutimut illersuutinik atuinerujussuat pissutaaqataasoq, tassani oqartussat nalilerpaat.

Inuppassuilli assersuutigalugu imerniartarfimmiikkaangamik kiinnamut assiaqutsit taakku peertaraat, allaallumi imigassartorsimatillutik imminnut qanittuaraasartut, Carrie Lamip aamma oqaatigaa.

Neriniartarfiit imerniartarfiillu 8600-t imigassamik sassaalliisinnaajunnaarallassasut

- Inuit imigassartorsimagaangamik ilaatigut qaninniartarput, Carrie Lam oqartoq, nutaarsiassaqartitsiviup AFP-p allaaseraa.

- Neriniartarfiit, imerniartarfiit qitigiartarfiillu imigassamik sassaalliinissamut akuersissuteqartut 8600-t missaat imigassamik sassaalliisinnaajunnaarallarsinnaanissaat taamaammat siunnersuutigaarput, Carrie Lam oqarpoq.

Pisiniarfeqarfissuit pisiniarfiillu imigassamik nioqquteqartartut matumani ilaatinneqanngillat.

Isummersuutit