Hondurasimi præsidenti nunaminit anisitaavoq

Illoqarfiit pingaarnersaanni Teguigalpa-mi akerlissutsimik takutitsisoqartoq nutaarsiassaqartitsiviit arlallit tusarliuppaat. Aqquserngit præsidentip illussaarsuata tungaanut aqqutit akerliussutsimik takutitsisunit assersorneqarput.

Amerikami qiterlermi sakkutuut naalagaaffimmik tiguaanerat kingullermik pivoq, sorsorsunnerup nillertup nalaanik taaneqartumi. Hondurasimi innutaasut akerliussutsimik takutitsinerannut pissutaavoq, præsidentiusup ukiuni tulliuttuni præsidentiunissaaminut kissaateqarluni innuttaasunik taasisitsinnissamik kissaateqarnera akerlerineqarmat.

Præsidentiusup præsidentiunnarnissamik kissaateqarnera sakkutuunit akerlerineqartuaannarsimavoq. Tamatumalu kinguneraa Præsidentiusimasoq Manuel Zelaya timmisartumut ikiteriarlugu Costa Rica-mut sakkutuut timmisartuuppaat, maannalu Costa Rica-mi qimaasutut nunasiniarluni qinnuteqarluni.

Roberto Micheletti præsidentiugallartussatut sakkutuunit ivertinneqarallarpoq.

Honduras-imi innutaasut aneqqusaajunnaarnissaannik Roberto Micheletti peqqussisimavoq.