Holland:Utoqqatserpugut ammip qalipaataanik assigiinngisitsisoqarmat
Hollandip nunanut allanut tunngasunut ministereqarfia, ministereqarfimmi sulisut ilaasa ammit qalipaataannik assigiinngisitsisarnerannut utoqqatsertariaqarsimavoq.
Nutaarsiassaqartitsivik AFP taama allaaserisaqarpoq.
- Ministereqarfimmi nunanilu tamalaani suleqatit misigisarsimasaat akuersaarneqarsinnaanngilaq, attorteqqavungalu, Hollandip nunanut allanut tunngasunut ministeria Twitterikkut allappoq.
Black Lives Matterimik taallugit akerliussutsimik takutitsinerpassuit kingorna nalunaarusiortoqarpoq, ministereqarfillu utoqqatsertariaqartutut maanna misigisimalluni.
AAMMA ATUARUK Black Lives Matter inussiaateqarsimaneq pillugu saqqummersitsinissamut isumassarsititsisoq
Qaamasumik amilinnit ilaatinneqanngitsutut soqutigineqanngitsutullu ilaatigut misigisarlutik, inuiaat ikinnerussuteqartut arlallit ministereqarfimmi atorfillit nalunaarusiami oqaatigaat.
Sulisunit arlalinnit "aapakaatut taartumillu ameqarnertik pillugu Zwarte pietitulluunniit taaneqartarnertik sulisut arlallit nalunaarusiami aamma oqaluttuaraat.
Zwarte piet tassaavoq Hollandimiut juullikkunnut tunngatillugu isiginnaagassiornermi inuttat ilaat. Inuit qaamasumik amillit kiinartik qernertumik tanillugu isiginnaagassiami Zwarte pietiusuusaartarnikuupput. Blackfacetut aamma taaneqartarput.
Holland nunasiaateqarsimasutut inussiaateqartarsimasutullu ukiuni kingullerni apeqquserneqartarsimavoq.