Hollandimiut Tunumi assilisaat Aalborgimut apuunneqarput
Tunumi nunaqarfimmi Tiniteqilaami 1960-kkunni, 70-ikkunni 80-kkunnilu ulluinnarni pisartunik assilisat saqqummersitsinermi takutinneqarput. Hollandiumiut katersugaasivimmeersut Gerti Nooterip Noortje Nooterillu nunaqarfimmi ukiut qulikkuutaat pingasut ingerlanerini suliaqartarnerminnut atatillugu assilisaraat.
Roots2sharemik suliniummut peqataasut tassaapput Leidenimi katersugaasivissuaq, Haagimi katersugaasivik, Nunatta Katersugaasivia Ammassallillu Katersugaasivia.
Aappariit Nooterikkut assilisaat 10.000-iusut nittartakkakkut 2011-mi tamanit takuneqarsinnaasunngortinneqarput. Assillu takusassarsiorfigalugit meeraanerup nalaani assilisat takuneqarsinnaallutillu nammineq oqaluttuassarsiorfigineqarsinnaapput. Haagimi katersugaasivimmi aamma assit aalajangersimasut saqqummersinneqarput, saqqummersitsinerlu angalatitaq siornatigut aamma Tasiilami Nuummilu saqqummersinneqarsimalluni.
Saqqummersitsineq Kalaallit Illuutaanni Aalborgimiittumi ornittakkami marsip 14-iata tungaanut takuniarneqarsinnaavoq.
