Hollandimiut peqqissaasut atorfinitsinnissaat unitsinneqarallarpoq
Hollandimiut atorfinitsinneqarnerannut atatillugu qallunaatut ilinniartinneqarnissaanut ajunngitsorsiassaqartinneqarnissaat, Peqqissaasut Kattuffiata Namminersorlutillu Oqartussat isumaqatigiissutaannut naapertuutinngimmat, atorfinitsinneqarnissaat unitsinneqarallarpoq.
Peqqissaasut tallimat hollandimiut peqqinnissaqarfimmi aalajangersimasumik atorfinitsinneqarnissaat pineqarpoq.
Atorfitsinneqartussatut isumaqatigiissuteqarfigineqartut tassaallutik peqqissaasut pingasut, ernisussiortoq ataaseq aassiusarfimmilu peqqissasoq ataaseq, sinerissami sulilersussatut isumaqatigiissuteqarfigineqartut.
Namminersorlutik Oqartussat Peqqissaasullu Kattuffiata isumaqatigiissutaat malillugu aningaasarsiaqarnissaat aamma aalajangeriigaavoq.
Qallunaatulli ilinniartinneqarnerannut ajunngitsorsiassaqartinneqarnissaat atorfinitsitsinermi isumaqatigiissuteqarnermi ilanngunneqarsimavoq, tamannalu pivoq Danmarkimi narkorsat peqqissaasullu paarlattaasartunut kiffartuussiviata Danmarkimiittup Vikarlæger.dk-p Namminersorlutillu Oqartussat akornanni isumaqatigiissuteqarnermi. Taamatulli iliorneq Namminersorlutik Oqartussat Peqqissaasullu Kattuffiata isumaqatigiissutaannik unioqqutitsineruvoq.
Paarlattaasartut kiffartuussivianni Vikarlægerimi Bagsværdimiittumi pisortaq Frederik Nagell oqarpoq, peqqisaasut qallunaatut ilinniarnerannut atatillugu ajunngitsorsiassaqartinneqarnissaannut tunngasoq isumaqatigiissutaaqqaartumi ilaanngitsoq ilisimasimanagu, tamassumalu ajornartorsiutaasinnaanera naatsorsuutigisimanagu.
Hollandimiut peqqissaasut qallunaatut ilinniartinneqarnerannut ajunngitsorsiassat 6.000 euronissaat isumaqatigiissutigineqarsimavoq, koruuninngorlugit 45.000 koruunit, taakkua Kalaallit Nunaanni peqqinnissaqarfimmi suliunnaarunik pissagaat isumaqatigiissutigineqarsimalluni, tassa soraarpata Namminersorlutik Oqartussat akilissagaat isumaqatigiissutigineqarluni, Frederik Nagell oqarpoq.
Karin Holler Peqqissaasut Kattuffianni siulittasoq oqarpoq, Kalaallit Nunaanni peqqinnissaqarfimmi sulilerusuttut sumiuunerat apeqqutaatinnagu atorfininnissaat ajoriffissaqartinnagu.
Filipinerininngaaneersunik peqqissaasunik sulisoqartoq nalunnginnerarpaa aammalu alla nunanit allaneersoq peqqissaasutut sulisoq ilisimallugu, taakkua immikkut ajunngitsorsiassaqartinneqanngilllat, aammalu erseqqissarlugu Kalallit Nunaanni peqqissasut peqqinnissaqarfimmi sulisut marluinnik oqaaseqartut amerlasuut ajunngitsorsiaqartitaanngitsut. Sulinermi atugassarititaasut aningaasarsiallu pillugit isumaqatigiissutit kikkunnut tamanut atuupput, taakkualu kattuffiup suliassarai Peqqissaasut Kattuffianni siulitaasoq, Karen Holler oqarpoq.
