Hollandimi utoqqaat atugarluttut

Hollandimi ippassaq qinersisoqarpoq. Taasinerit suli kisinneqarput naalakkersuisooqatigiilersussallu qaammat qaangiuppat pilersinneqarnissaat ilimanarpoq.

Qineqqusaarnerup nalaani utoqqaat atugaat eqqartorneqangaatsiarput. Taamaattumik utoqqaat pitsaanerusumik atugaqalernissartik neriuutigaat.

Hollandip illoqarfiisa amerlanersaanni utoqqaat pingasukkuutaarlutik sisamakkuutaarlutilluunniit ineeqqatigiittarmata Doini utoqqaat assut iluanaarput. Tassanimi marlukkuutaaginnarlutik ineqatigiittarput. Arnaq 74-inik ukiulik Doinimi utoqqaat illuanni najungalik sininnialeraangami aatsaat ineeqqaminukartarpoq. Ineeqqami, napparsimmavimmisut, saajoqarpoq – ineqatigiit imminnut isigerusunngikkaangamik saajusarpaat. 74-inik ukiulik isersimaartarfimmiittoq naammattoorpara oqaloqatigilerannilu kisimi ineqarnissi kissaatigalugu oqarfigivaanga:

- Qujanartumik ineqatigalugu nuannariippugut. Ilagut ineqatigiinnerlullutik ulloq unnuarlu oqqappaluttarput, 74-inik ukiulik oqarpoq.

Partiit siuttuisa oqallinneranni utoqqaat atugarisaat eqqartorneqalerput. Naalakkersuisooqataasimasut utoqqaat sipaarniarfigimmatigit sakkortuumik Socialdemokratit siuttuannit avoqqaarineqarput. Utoqqaat sipaarniarfigineqarmata amerlasuukkuutaarlutik ineqatigiisinneqartalerput sulisuilu ikilisarneqarlutik. Utoqqaat sapaatip-akunnerata ingerlanerani arlaleriarlutik sinngusaannaq siniffimminni nikeriarsinnaanatik innangasariaqartartut utoqqaat qanigisaasalu peqatigiiffii nalunaaruteqartarput.

Naalakkersuisooqataasimasut ilaat imminut illersorluni oqarpoq: 2010 nallertinnagu utoqqaat immikkut ineqalernissaat neriorsuutaareerpoq.

74-inik ukiulik arfineq-marlunnik ernutalik sutigut tamatigut nammineersoreersimalluni tamatuminnga naammagininngilluinnarpoq:

- Immikkut ineqarnissara pingaaruteqartorujussuuvoq, 74-inik ukiulik oqarpoq.