Hollandimi pruffiiti muuamaat qassiiliuutigilerpaat

Hollandimi Muuamaat aamma perulluliuutigineqalerpoq. Hollandimiup politikerip Islamimut akeqqersimaartup muslimit pruffiitiat kisiat pinnagu upperisamik Islam-imik ajuallatsitsisimasutut pisuutinneqarpoq. Saudi Arabiallu pisortatigoortumik utoqqatserfigineqarnissani piumasaraa:

Hollandimiup politikerip talerperliuniartuusup Geert Wildersip muslimit taakkualu upperisaat imaannaanngitsumik saassuppai.

Taassuma piumasaraa Hollandimut killeqarfiit musliminut matoqqatinneqassasut aamma Hollandimi muslimit oqaluffiisa koranimillu atuarfiisa inerteqqutaalernissaat piumasaraa.

Maanna aviisimi apersorneqarluni Islam tassaanerarpaa nakuusertartut upperisaat.

- Muuamaat ullumikkut inuusuugaluarpat uuliateriarlugu usserummillu taneriarlugu meqqunillu sussaajunnaarseriarlugu nunamit maanngaanniit anisissagaluarpara, Wilders oqarpoq. Ilanngullugu oqaatigaa muslimit Hollandimi najugaqarniarunik koranip affaa igeqqaartariaqaraat.

Taamatut oqaaseqarnera Hollandimi nunanut allanut ministereqarfimmi ulapaartitsilerpoq. Ministereqarfimmi sulisut Haagimi Saudi Arabiap aallartitaanik ataatsimeeqateqaqattaarput. Saudi Arabiamiut aviisiat aamma allaaserisaqarpoq aallartitaq piumasaqarsimasoq Wildersip oqaatsini utertittariaqarai aamma muslimit utoqqatserfigisariaqarai.

Nunanut allanut ministereqarfimmit oqaaseqartitaq nalunaarpoq, nunanut allanut ministerip Wildersip oqaasii ajuusaarutigigai, naalakkersuisullu taama isumaqannginnerarlugit. Naalakkersuisut aamma musliminik suleqateqarluartuusut oqaatigineqarpoq. Tassami ministerit marluk muslimiummata.

Taamaattorli Geert Wilders utoqqatserumanngilluinnarpoq.

- Niaqulaalerassi, qanoq aamma naqisimaneqarani oqaaseqarsinnaatitaanngitsup qanoq oqarnissannik ajoqersuutissavaannga? Geert Wilders aperivoq.