Hollandimi partii liberaliusoq anginerpaanngorpoq
Partii taanna inatsisartuni 150-inik ilaasortalimmi 31-nik ilaasortaatitaqalernermigut partiini anginerpaanngorpoq, tassa Socialdemokratinit ataatsimik amerlanerussuteqarami.
Musliminut akeqqersimaartup Geert Wildersip partiia, kiffaanngissusillit partiiat, qinersinermi ajugaasuuvoq. Tassa qulingiluanik ilaasortaatitaqaraluarlutik maanna 24-nik ilaasortaatitaqaleramik, taakkulu taamaalillutik naalakkersuisunngortitsinermi pingaarutilimmik inissisimanissartik neriuutigaat.
Qinersinermi ajorsarnerpaat tassaapput maannamut naalakkersuisuutitaqartut Kristendemokratit partiiat CDA, taakkumi inatsisartuni 41-nik ilaasortaatitaqaraluartut maanna 21-iinnarnik ilaasortaatitaqalermata. Qinersinerup inernerata kinguneranik Peter Balkenende ingerlaannartumik atuutilersumik partiimi siulittaasutut tunuarpoq.
Hollandimi kikkut naalakkersuisunik pilersitsissanersut ulluni tulliuttuni aalajangiiffigineqassaaq.