Hollandimi eqqartuussineq kinguartinneqarpoq

Hollandimi eqqartuussiviit aqqutigalugit Cairn Energyp Greenpeace unnerluutigaa, aningaasanillu taarseeqqusillutik. Eqqartuussinerlu tamanna ullumi ingerlanneqarpoq. Cairn Energy aningaasanik taarsiiffigitissanersoq aatsaat pingasunngorpat aalajangerneqartussanngorpoq.

Tamassuma saniatigut avatangiisit pillugit ilungersuutiginnittut Greenpeacemeersut inuusuttut 18-it, Nuup Eqqartuussiviani eqqartuunneqarput. Taakku qillerummut Leiv Eirikssonimut qaqillutik akerliunerminnik takutitsinerat Nunatsinnit anisitaanerannik kinguneqarpoq. Taakkuninnga eqqartuussineq Nuup Eqqartuussiviani ullumi nalunaaqutaq ataatsinut aallartippoq.

Cairn Energyp Greenpeacemik unnerluutiginninnera Hollandimi illoqarfimmi Amsterdamimi ingerlanneqarpoq, eqqartuussinerlu nalunaaquttap akunnerinik pingasunik sivisutigaluni. Eqqartuussinerli inerneqanngilaq, taamalu tusarniaaneq sivitsorneqarluni.

Greenpeacep siunissami qillerinernik unitsitsinissaa pinngitsoortinniarlugu Cairn Energy eqqartuussivilersuussivoq. Siunissami Greenpeace qillerinernik unitsitsissagaluarpat taakku ullormut 2 millionit euronik akiligassinneqartarnissaat Cairn Energyp qulakkeerusuppaa.

Cairn Energyp eqqartuussinermi illersuisuisa Greenpeace pisuutippaat, taakku qillerivimmut qallornerminni ikittaatinik nassataqartarsimammata, tassami isumannaallisaaaneq pissutigalugu ikittaatinik qillerivimmiittoqaqqusaanngilaq.

Taamaattoqartarsimanera Greenpeacep illersuisuisa eqqunnginnerarpaat, oqarlutik allamik iliuuseqanngitsut, taamaallaalli eqqissillutik akerliunerminnik takutitsimmata. Dow Jonesip Nutaarsiassaqartitsivia allappoq.

Eqqartuussinerup nalaani Greenpeacermiut eqqartuussisumut piumasarigaluarpaat, uuliamik maangaannaq maqisoortoqassagaluarpat, Cairn Energyp sillimaniarnermut pilersaarutaa eqqartuussivikkut saqqummiunneqartariaqaraluartoq. Tassarpiaavorlu pilersaarutip tamanut saqqummiunneqarnissaanik Greenpeacep piumasarisaa, taamaattumillu qillerummut Leiv Eirikssonimut qaqillutik akornusersuisarnerinut pissutaasoq.

Greenpeacep taama piumasaqarnera, Cairn Energymit uppernarsineqarusunngilaq. Eqqartuussinermi inernerusussaq pingasunngorpat pisussaq utaqqeqqaarneqarusuttoq Cairn Energyp oqaaseqartartua, Elisabeth Adams KNR-imut allakkamini oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat