Holdit sorliit semifinalimut anngutissanersut unnugu paasinarsissaaq

Angutit isikkamik arsaallutik ukioq manna pissartanngorniunneranni holdit sorliit sisamat semifinalimut ingerlaqqissanersut unnugu paasinarsissaaq.

Ualeq marloriarluni unammisoqarpoq. Unamminernilu angusat imaapput:

Gruppe 1 mi N-48 Ilulissaneersut Qeqertarsuarmeersunut G-44-mut 2-1-mik ajugaapput.

Taamaalilluni ilimanarsilluinnarpoq gruppe 1-miit N-48 semifinalernissami Nuummeersunut B-67-mut unammissasut-tassami pissartanngorniunnerni aaqqissuisut, SAK, Nuummeersullu B-67 Sisimiut arsaattarfianni unammimmata arsaannerup immikkoortuani siullermi B-67 pingasunik siuaqqavoq.

Gruppe 2-mi A.T.A. Tasiilameersut arsaalluaqisut suli ingerlalluaqaat, N-85-mut Narsameersunut unammigamik arfineq-pingasoraarlutik ajugaagamik, akeqqatik sisamaraartut. A.T.A.-p semifinalimi peqataanissani ippassarli qulakkeereerpaa.

Gruppe 2-meersut unnugu unamminissaanni Malamuk Uummannameersut, aamma K-33 Qaqortumeersut unammissapput. Malamuk unamminermi tassani ajugaasinnaaguni semifinaalimut kingullermut anngussinnaassagaluarpoq.