Libanonip kujasissortaani Hizbollah-kunnut saassussisaqattaarnerup timmisartuningaanniit pinnani nunakkulli pinissaa sulilu sakkortunerulernissaa Israelimi nunamik naalakkersuisoqarfiup isumannaallisaanermut immikkoortortaata sakkutuunut unnuaq inassutigaa. Israelimi naalakkersuisunit tusarfiit ilaat ullaaq-manna taama ilisimatitsivoq.
Saassussinerup Libanonip kujasissuaniit kilometerinik arlalinnik piffissami aggersumi annertusineqarnissaa sakkutuut unnersuussutigaat, tamatumalu qaqugu pinissaa israelimiut sakkutuuisa aalajangeriaannaavaat.
Syriami præsidentip, Bashar al-Assad-ip, sakkutuumi upalungaarsimanertik sakkortuseqqullugu ippassaq unnukkut naalakkersimavai.
Nunamiit saassussiffiup annertusineqarnera israelimiut tungaanniit malunnaqaaq. Israelip Radioa naapertussagaanni, sakkutooqatigiit pissamaatit pingasut saassusseqataanissaminnut piareerlutik kalerreeqqullugit peqquneqarsimapput. Tassalu imaalerpoq sakkutuut 15.000-t missaat immikkut qaaqquneqartut.
Libanonip kujasissortaani ullaaq-manna kingumut aporaattoqarpoq. Partisanit Hizbollah-kunnut attuumassutillit 20-t israelimiut sakkutuuinit toqunneqartut, Israelimi sakkutuut ilisimatitsissutigaat. Libanonip Israelillu killeqarfianit kilometerinik arlaqanngitsunnguanik ungasitsigisumi akersuuttoqarnerani tamanna pivoq.