HIV/AIDS-ip akiorniarneqarnissaat pingaarnerutissagunarpaa

Afrikap Kujataani naalagaaffimmi partii naalakkersuisuutitaqartoq, ANC, siulittaasussaminik qinersimmat, præsidentimut tullersortaasimasoq Jacob Zuma qinigaavoq.
Allattoq Mads Lynge
decembarip 19-at 2007 11:13

Præsidentimik 2009-mi qinersisoqarpat Zumap Afrikap Kujataani præsidentinngornissaa taamaasilluni ilimanarsinnaavoq.

Zuma qinigaammat demokratii ajugaavoq. Tamaanimi demokratiimik pilersitsinissaq ajornakusoortaraluaqimmat. Danmarks Radiop Afrikamit tusagassiisartua Frank Nellemann taama oqarpoq.

- HIV-p AIDS-illu akiorniarneqarnissaat Jacob Zumap pingaarnertut aallutarissagunarpaa, piitsuunerlu aamma akiorniassallugu, Frank Nellemann oqarpoq, nangipporlu:

- Maannamut præsidentiusup Thabo Mbekip tamanna iluatsissimanngilaa, Afrikap Kujataani naalagaaffiup aningaasarsiornera pitsaasumik ingerlasup attatiinnarneqarnissaa pingaarnerutikkamiuk. Zumalli politikkia allaanerungaarnaviarunanngilaq. Tassa aningaasarsiornermut politikkip allanngortinneqarnissaa ilimanaateqanngimmat. Ataatsimut oqaatigilluaannarlugu: Jacob Zuma mianersorluni iliuuseqartariaqassaaq, Frank Nellemann naggasiilluni oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq