HIV-mik tunillatsissinnaaneq Kalaallit Nunaanni sapinngisamik pinaveersaartinneqarpoq
HIV-mik tunillatsisimagaanni nalunaaqutttap akunnerata affaata ingerlanerani paasineqarsinnaasumik atortorissaaruteqarpoq. Danmarkimi napparsimmavissuarmi Rigshospitalimi piffissami kingullermi aalersortissimasut HIV-mik tunillatsissimasut marluk paasineqarput, atortorissaarummillu sukkanerusumik paasinnissinnaasumik pisisoqalersoq, tusagassiorfinni sammineqarpoq.
Namminneq piumassutsiminnik aalersuisartut, aalersuisartunngunnginneranni apeqquterpaalussuarnik immiussugassaminnik tunineqartarput, akissutillu ilaat HIV-eqarsinnaanermut ilimanaateqarpata, aalersuisartunngortinneqarneq ajorput, Inge-Lise Kleist oqarpoq. Assersuutigalugu arlalinnik atoqateqartartut, kinguaassiuutitigullu nappaateqartartut, imaluunniit anguteqatiminnik atoqateqartartut aalersuisartutut atorneqarneq ajorput. HIV-toqarneranik sukkasuumik paasinnissinnaasunik sinerissami illoqarfinni napparsimmaveqarfiit tamarmik atortorissaaruteqarput, sulilu qulakkeernerujumallugu Dronning Ingridip napparsimmavissuani aaviisarfimmut nassiunneqartarput, aaviisartut ningiuat Inge-Lise Kleist oqarpoq.
