HIV-mik tunillanneqartartut ikiliartorput

HIV-p uumasuaraanik tunillanneqartartut ikiliartorput. Naalagaaffiit Peqatigiit nuannersumik naliliinerat taama nipeqarpoq.

Tunillanneqartartulli ikiliartoraluartut ajornartorsiut suli annertoqaaq.

Nappaassuaq AIDS pillugu ataatsimeersuarneq New Yorkimi ullumi aallartippoq.

HIV-p uumasuaraanik tunillanneqartartut ikiliartornerat mianersortunnguamik nuannaarutigineqarpoq, AIDS pillugu Naalagaaffiit Peqatigiit ataatsimeersuartitsineranni aqutsisoq ullumi ilaatigut taama naliliivoq.

- Siuariartorpugut, nappaassuulli AIDS-ip tunillaassuunnera qaangeriartunngilarput, suli suliassaqaqaagut. Neriuutissaqalaarpugulli!

Assersuutigalugu oqarsinnaavugut HIV-p uumasuaraanik tunillanneqartartut Kenyami, Zimbabwemi Haitimi Cambodjamilu ikiliartortut nalunaarfigineqartaratta, nappaassuarmilli taassumannga tunillanneqartartut nunarsuatsinni ilumut ikiliartorput. Taammattoqarneranullu pissutaavoq, usuup pooqartarneq atorneqaleriartuinnarmat, aalajangersimanerusunik atoqateqartalerneq, arnaatit angutaatilluunniit taarserarpallaarnagit, aammalu inuusuttut atoqateqaqqaartarnerat siusippallaarunnaarsimalluni. Nakorsaatit amerlanerit pitsaanerillu aamma takkussuunnerat pissutaaqataavoq. Siuariartornerli tamaanga killeqarpoq. Nakorsaatit akisuallaarujussuarnerat pissutigalugu kikkunnit tamanit akissaqartinneqanngilaq. HIV-p uumasuaraanik AIDS-imillu nunarsuaq tamakkerlugu tunillanneqarsimasut ullumikkut 40 millionit missaanniittut, Naalagaaffiit Peqatigiit nalilerpaat.

Amerlanerpaat Afrikap kujasissuaniipput, Indiamili aamma napparsimasoqarpoq. Asiap kujammut kangiani aamma Europap kangiani inuppassuit taama napparsimapput.

Inuit tallimat HIV-mik AIDS-imillu Kalaallit Nunaanni ukiuni kingullerni tallimani tunillatsissimapput.