HIV-mik tunillanneqarsimasut ikiorserneqartarnerat pitsaanerulersimasoq, Dronning Ingridip Napparsimmaviani Nuummiittumi nakorsaaneq HIV-millu tunillanneqarsimasunik sullissinermik akisussaasoq Karin Ladegaard oqarpoq.
Nakorsaat 1996-mi sunniuteqarluartoq nassaarineqarmat, Danmarkimi nunanilu killerniittuni AIDS-p toqqutaasarnera appariarsimavoq. Nunatsinnili tamatuma appariartornera aatsaat maanna malunniukkiartulersimavoq, ilaatigut peqquteqartinneqarluni, nunatsinni HIV-mik tunillanneqarsimasut arlallit siornatigut eqqortumik nakorsaaseruminaatsinneqartarsimanerat.
Ukiuni kingullerni arfinilinni kalaallit HIV-mik tunillanneqarsimasut agguaqatigiissillugu ukiumut arfineq-marluk qulingiluallu akornanniittarput.
Danmarkimut sanilliutissagutsigit, Danmarkimi innuttaasut 1000-iugaangata 0,7-t HIV-mik tunillanneqarsimasarput. Nunatsinnili tunillanneqartartut agguaqatigiissillugu amerlanerupput, tassa 1000-iugaangata 1,4-t HIV-mik tunillanneqarsimasarlutik.
Nakorsaaneq Karin Ladegaard erseqqissaavoq, nunatsinni inuit qassinilluunniit ukioqaraluarunik aaversinnissaminnut tunuarsimaartanngitsut.