HIV-mik tunillanneqarsimasoq: Ikiorserneqartarneq annikippoq

HIV-mik tunillanneqarsimalluni paasitinneqarnermi pisariaqarpoq ikiorserneqapallannissaq. HIV mik ukiut 16-it matuma siornatigut tunillanneqarsimasoq, Tom Semionsen oqarpoq, nunatsinni HIV-mik tunillanneqarsimasut inuttut ingerlaqqinnissaannut ikiorsiisarneq annikippallaartoq:

- Ajornartorsiutinngoriartuinnnarpoq nunatsinni, kisiannili nunatsinni pisortaninngaanniit suli HIV- ertunut atugassarititanik ujartuinngillat politikkukkulluunniit iliuuseqartoqanngilaq, Tom Semionsen oqarpoq.

Tom Semionsen Danmarkimiitilluni HIV- mik tunillanneqarsimanerminik paasitinneqarpoq, ikiorserneqarluaramilu ingerlaqqinnissamut nukissaqarsimalluni:

- Qujanartumik unaga taamani Danmarkimiissimavunga. Nammineq saaffiginninninngikkaluarlunga tarnip pissusiinik ilisimasalimmik orninneqarsimavunga aammalu HIV-ertut orniguttarfiannut innersuunneqarsimallunga. Ikiorserneqarluarnera iluaqutigalugu ingerlaqqissinnaalersimavunga; Tom Semionsen oqarpoq.

HIV-mik tunillanneqarsimasut tapersersorumallugit Malene Didriksen Nuummi HIV-mik tunillanneqarsimasut orniguffigisinnaasaannik siorna decemberip aallaqqaataani ammaavoq, orniguttarfilli inunnit ataasiakkaaginnarnit ornigarneqartarpoq.

Malene Didriksen isumaqarpoq, inuiaqatigiinni nappaat akuerineqaleriartoraluartoq HIV-mik tunillanneqarsimasut annertuumik tapersersorneqarnissamik pisariaqartitsisut.

-Taama nappaammik annertutigisumik tunillanneqarsimatilluni tarnikkut suliassartarujussuaqarpoq.

- Ulluinnarni inuunermi eqqartugassarpassuit eqqartorneqarneq ajorput; sorlu ilaqutariinnermut suliffinnullu tungasut sulilu saniatigut nipangiissinerit nammataralugit artornarsimassaqaaq; Malene Didriksen oqarpoq.

Malene Didriksen isumaqarpoq orniguttarfik atorfissaqartinneqartoq, taamaattumik matunissaa pilersaarutiginngilaa.

HIV-mik tunillanneqarsimasut orniguttarfiat Nuummi Blok 6 - 003- miittoq sisamanngornerit allortarlugit arfineq-marlunit qulingiluat tungaannut ammasarpoq.