HIV-imik tunillaasoqarnissaanik sulissuteqarsimasorisat
Nakorsaq ataaseq peqqissaasullu tallimat Libyami toqumut eqqartuunneqarput. Taakkua meeqqanik 400-nik HIV-p uumasuaraanik – piaaralutik – tunillaasoqarnissaanut sulissuteqarsimasutut pisuutinneqarput.
Nunani tamalaani immikkut ilisimasallit eqqartuussineq isumaqanngilluinnartutut naapertuilluanngitsutullu isigaat – maannalu Libyen ajornartorsiortorujussuanngoqqippoq.
Nakorsaq palæstinamiu peqqissaasullu Bulgariamiut tallimat ullaap tungaani aallaallugit toqunneqartussanngorlugit eqqartuunneqarput.
Taakkuali eqqartuussut suliassanngorteqqissinnaagaat oqaatigineqarpoq.
Maannamut eqqartuussineq pillugu EU qisuariaateqarpoq, tassa eqqartuussiveqarnermut kommissæri qisuariaateqapallalluni oqarpoq, eqqartuussineq quarsaarutigigini tamannalu Libyap EU-mut suleqateqarniarneranut akornutaassasoq.
Kommissærip Libyami pisortat pisoq eqqarsaatigeqqeqqullugu kajumissaarpai.
Nakorsaq Palæstinamiu peqqissaasullu 1999-imili parnaarussatut tigummineqalerput.
Suliassami pineqarput meeqqat 426-t HIV-ip uumasuaraanik tunillanneqarsimasut. Taakkua HIV-p uumasuaraanik tunillanneqarsimanerat qularutissaanngilaq, matumanili qanoq ilillutik tunillanneqarsimanerat pineqarpoq. Unnerluussisut oqarput nakorsap peqqissaasullu piaaralutik meeqqat tunillassimagaat.
Libyap kisermaassilluni naalakkersuisua oberst Cadaffi oqarnikuuvoq Israelimiut aamma Amerikamiut kilitsissiaqarfii pisooqataanerarlugit. Taamaattorli nunani tamalaani immikkut ilisimasallit oqarput nakorsaq peqqissaasullu atorfinitsinneqanngikkallarmatali meeqqat tunillanneqarsimasut. Taakkua oqarput napparsimavimmi eqqiluisaannginnerujussuup kinguneranik meeqqat tunillanneqarsimanerarlugit tamannalu Libyap nassuerutigiumanngikkaa, taamalu nakorsaq peqqissaasullu pisuutinneqartut.
Aammattaaq eqqartuussineq nunani tamalaani eqqartuussissuserisunit isornartorsiorneqarpoq, oqartunit uppernarsaatit ilimatuussutsikkut suliaannginnerarlugit.
Eqqartuussineq Cadaffimut ajornartorsiortitsilerpoq.
Tassami Cadaffi nunanit tamalaanit akuerineqarnissamik anguniagaqarpoq taamalu sakkussakillisaanermik ingerlataqarluni soorlu atombombemik sakkussiornini unitsissimavaa. Taamaattorli toqumut eqqartuussineq nunanit tamalaanit kukkuluttornertut isigineqarpoq qularnanngilarlu kamaatigineqaqisoq malinnaaffigeqqissaarneqassasorlu.
