HIV Europap kangisissuani tuniluuttoq

HIV-mut tunillatsissimanermut misissuisarnerit, ingammik Europap kangisissuani, Ruslandimi Asiallu qiterpasissuani annertusarneqarnissaat, EU-mi nappaatit tuniluuttut pillugit akiuiniaqatigiiffik Naalagaaffiillu Peqatigiit peqqissuunissaq pillugu suleqatigiiffiata, WHO-p, maannna kaammattuutigaat.

Virusip nappaammik AIDS-imik pilersitsisartup tuniluunnerata malinnaavigeqqissaarneqarnissaa pingaaruteqarpoq, nappaatip tuniluunnerata unikaallatsinneqarsinnaanissaa anguneqarsinnaaniassammat.

Inuit 136.000-t sinnerlugit WHO-p Europami immikkoortortaani HIV-mik tunillanneqarsimasut, WHO-p nalunaarusiaani ilaatigut takuneqarsinnaavoq, taakkunanngalu 80 procentit sinnerlugit Europap kangisissuaniillutik.

AAMMA ATUARUK Ruslandimi HIV tunillaassortoq

HIV-ertut nassaarineqartut affaasa missaat nappaat sivisuumik atorsimavaat, timillu nappaammut akiuussinnaanera taamaalilluni sanngiillereersimalluni. WHO taama ilisimatitsivoq.

- Covid-19-ip tuniluutileruttornerani nappaatit toqqutigineqarsinnaasut allat, soorlu HIV, sissuerunnaassanngilagut, nappaatit tuniluutilinnginnissaat pillugu Europami qullersaqarfiup pisortaa Andrea Ammon oqarpoq.

HIV ingammik atoqatigiinnikkut tuniluuttarpoq, kapuutillu atorlugit ikiaroorartartut kapuutinik avitseqatigiinneranni aamma tuniluuttarluni, tamannalu Europap kangisissuani siammassimasorujussuulluni.