HIV-imik tunillanneqarsimasoq, 64-inik ukiulik Antoinette Larsen Sisimiuneersoq, AIDS-ip ullua iluatsillugu inuiaqatigiinnut kajumissaaruteqarpoq isumannaatsumik atoqatigiinneq pillugu inuusuttuaqqanut ilitsersuussisarnissamik. HIV pillugu ammasumik oqaluuserinninnissaq aamma kaammattuutigaa, taamaalilluni nappaat siaruatsaaliorneqarsinnaanerussammat.
Antoinette Larsenip 1997-imi paasivaa
HIV-imik tunillanneqarsimalluni.
Tamanna inuttut nakkariaatigigaluarlugu paasisimavaa nappaatini isertuarani oqaluuserisinnaaguniuk avatangiisiminit tapersersorneqarnerusinnaalluni. Taamaalillunilu aamma nappaanni pillugu inuusuttunut oqalugiartalersimavoq.
Nunatsinni HIV-imik 1985-ip 2004-llu akornanni tunillanneqarsimasut 136-upput, taakkunannga meeqqat marluullutik. 47-it AIDS-imik ullumimut toqquteqarsimapput.