HIV-eertoq ukiuni arfineq-marlunni parnaarussaasussanngorpoq

Angut ukiut arfineq-marluk parnaarussivimmeereeruni Sverigemiit anisitaassaaq, arnanullu tunillassimasaminut svenskit aningaasaannik katillugit 267.000 koruuninik taarsiisussanngortitaavoq.

Angutip ukiuni arlalinni nalusimanngilaa HIV-ip uumasuaraanik tunillatsinnikuulluni, taamaakkaluarlorli illersuuteqarnani arnanik atoqateqartarsimavoq, tamannalu nammineq aamma nassuerutigereerpaa.

HIV-ip uumasuaraanik tunillatsissimagaanni, tunillatsissimasoq, atoqateqarniaruni, Sverigemi inatsisit malillugit, pinngitsoorani illersuuteqartussaavoq, atoqatigisanilu nappaamminik ilisimatittussaavaa.

Angutip allap 32-nik ukiullip, Stockholmimeersup, HIV-ip uumasuaraanik aamma tunillatsissimasup, arnanik hornorujulippassuarnik atoqateqarsimasutut pasineqartup, suliassartaa aamma maanna misissoqqissaarneqarpoq. Arnat HIV-ip uumasuaraanik aamma tunillatsissimasut illersuuteqaratik angutinik atoqateqartarsimasutut siusinnerusukkut pillagaanikuupput.