Filmimi pingaarnertut inuttaasoq "Hinnarik" apriilimi maajimilu Kitaani illoqarfinni tallimani angalassaaq filmilu Nuummi inuppassuarnik ussagartitsisimasoq takutittassallugu.
Pingaarnertut inuttaasoq ulluinnarni Angajo Lennert-Sandgreenimik ateqarpoq. Piffissami aggersumi illoqarfiit Qaqortoq, Narsaq, Maniitsoq, Aasiaat Ilulissallu aqqusaarneqassapput.
Filmip nunatta Kitaani takutinneqarnissaa iluatsissimavoq Grønlandsbanken 30.000 koruuninik tunissuteqartikkallarlugu. Tamannalu filmiliortup Tumit Productionsimeersup Aka Hansenip nuannaarutigaa oqarlunilu:
- Tassami billetsinut najugaqarnermullu aningaasaliisussanik piffissami sivitsortumi ujarlersimavugut. Taamaattumillu kiisami tamanna iluatsimmat nuannaarpugut, Aka Hansen oqarpoq.