Hinnarik arpattunut akuuvoq
Timigissaatigalugu arpannerit, sikkilernerit sisoraatinillu oqilaniunnerit ingerlanneqarpoq peqqinnarnerusumik inuuneqalernissaq anguniarlugu suliniut ”Maajimi peqqissuusa” Tasiilami ingerlanneqarmat.
Meeqqanut inersimasunullu arpatsitsineq maajip arfernat ingerlanneqartoq tupaallannartumik imaqarpoq quiasaarisartoq Hinnarik takkummat kissassernermilu peqataalluni.
- Hinnarimmik kissasseqateqarneq meeqqanut misigisaavoq puigunaatsoq pisarnermisullu Hinnarik qiimalluni eqqumiilaartumik quiasutsitsivoq, Patrick M. Abrahamsen Tasiilami Maajimi peqqissuusamik aaqqissuisut sinnerlugit oqaluttuarpoq.
Timigissaatigalugu arpatsitsinerit soqutigineqarluarsimapput ilaatigut Tele Post Tusas taaguusiullugu arpatsitsisoqarluni. Meeqqani angutini arnanilu oqilanerit pingasut Tusas-inik akissarsitinneqarlutik. Peqataasut 109-upput illoqarfiullu 1.174-nik inoqarnera najoqqutaralugu peqataasut amerlassusaat aaqqissuisut iluarisimaarluarpaat.
- Maajimi peqqissuusami aallartisarnerup suli nalaaniippugut, kisianni malunnarluarpoq meeqqat inuusuttullu aaqqissuussisoqallattaanera iluarisimaaraat, Patrick Abrahamsen taama oqaluttuarpoq.
Tussiarfissuarmi tallimanngorpat arpatsitsisoqartussaavoq unnuap qeqqalivinnerani arpanneq aallartissalluni. Aaqqissuisut aamma neriuutigaat qanittumi sikuerumaartoq Maajimi peqqissuusap ingerlanneqarnerani kajartuartitsinerit aamma ingerlanneqarniassammata.
