Hingitaq 53 Qaanaami misissuivimmik perusuppoq
- Qaanaaminngaaniit piumasaqaatigaarput misissuivimmik Qaanaami inissiisoqarnissaa, taavalu nunaqarfinnut qerititsivinnik, taamaalilluta kaaviiaartumik, ukiup qanoq ilinera apeqqutaatinnagu, avatitsinniittut uumasut, inuit assigisaallu assigiimmik tamarmik misissorneqarnissaat siunissami taamaasillugu aaqqiivigineqarsinnaanersoq siunnersuutigaarput, Ûsaqqak Qujaukitsoq oqarpoq.
Aperineqarami sooq, ima akivoq:
- Tassa uagut ukiut kingulliit malugisartakkavut pitsanngoriartunnginnamik, tassa timmisartorsuup nakkarfiata mingutsitsinera siaruariartorami, taavalu piffinni assigiinngitsuni takusartakkavut najoqqutaralugit uumasut, imarmiuugunik imaluunniit timmiaagunik ajoqusersimasut uagut takusinnaasavut najoqqutaralugit amerliartorneri tunngavigalugit taamatut piumasaqarpugut, Uusaqqak Qujaukitsoq naggasiivoq.
Folketingip Kalaallit Nunaat pillugu ataatsimiititaliaani siulittaasup, Lars-Emil Johansenip, nakkutilliiviusumik misissuivimmik pilersitsisoqarnissaanik isuma akorluarpaa:
- Isumaqarpunga siunnersuut, Qaanaami peqatigiiffik Hingitaq ‘53 sinnerlugu Ûsaqqak Qujaukitsup saqqummiussaa torrallatarujussuusoq. Oqaaserpassuit maannamut aniatinneqartarsimapput, timmisartorsuup nakkarnerata kingorna inunnut sunniutai suunersut erseqqissumik manna tikillugu paasisimanngilarput. Tamakku misissornissaat pissappat soorunami aamma inuit inuussutigisaat misissorneqartariaqarput, taamaattumik misissuivimmik pilersitsinissamik eqqarsaat uanga nammineq tapersersornartippara. Kisianni soorunami oqaatigisinnaanngilara atatsimiititaliap tamakkiisup qanoq isumaqarfigineraa. Paasissutissat ullumikkut tusarpavut, taakkulu tunngavigalugit oqallisissaagut, Lars-Emil Johansen naggasiivoq. Peqqinnissamut ministeri B-52-ip 1968 nakkarnera pillugu sisamanngorpat isumasiorneqassaaq.