Hillaryp Nuup kangerlua nuannarivippaa
Ilimagineqareersutut sillimaniarnermi paarsisorpassuaqarpoq, Hillary Clinton angallammut takornariartaammut ilaalluni Nuup kangerluanut ingerlammat, seqinneraluarluni qiianakujukkaluartoq nuannisarsimanerarpoq.
- Kangerlummut qaqqanullu isikkivigippugut. Aamma tikeraarnerput pillugu nassuiaanneqarluarpugut. Ualimut ataatsimiinnissaq pillugu qilanaarpugut, Hillary Clinton taama oqarpoq.
Issittumi siunnersuisooqatigiit kultuurikkut illorsuarmi Katuami ataatsimiilernissaat sioqqullugu ullup qeqqasioqatigiittoqartussaavoq, Danmarkillu nunanut allanut ministeriata Lene Espersenip naatsorsuutigaa politikkikkut oqallinnissaq sioqqullugit inissitassat kingulliit ullup qeqqasiornermi inissinneqarumaartut.
Nuutoqqami puttasut eqqaanni meeqqat atuartut arlallit alapernaaserlutik aamma najuupput, utaqqiisaalu paarsisut ilassiorfigalugit. Uisaallattupilussuuppullu paarsisut ilaata kavaajani quppermagu, taamaasillutik meeqqat uppernarsigujaat USAp nunanut allanut ministeriata paarsisui sakkulersorsimasuusut.
