Hillary sapaatip akunnera tulleq tikissaaq

Ullup affaani ataatsimiinnissaq pillugu tusagassiortunut nunanit tamalaaneersut Nunarput sammisussanngorpaat. Issittumi siunnersuisooqatigiit sisamanngorneq maajip aqqaneq aappaat ataatsimiissapput ilaatigut peqataasoralugit USAp nunanut allanut ministeria Hillary Clinton aamma Ruslandip nunanut allanut ministeria Sergei Lavrov taakkulu najuuttussaanerat soqutiginnilersitsivoq.

Hillary Clinton aamma Sergei Lavrov sillimaniarnermut sissuertuminnit ingiallorneqassapput sapaatip akunnera tulleq ataatsimeeqataalerunik. Tamanna pissutigalugu Katuaq kikkunnit tamanit iserfigineqarsinnaajunnaarallassasoq, nunanut allanut tunngasunut naalakkersuisoqarfik ilisimatitsivoq.

- Ataatsimiinnissaq sioqqullugu Katuaq misissoqqissaarneqassaaq isumannaatsuunera qulakkeerniarlugu, nunanut allanut naalakkersuisoqarfimmit Pernille Møller ilisimatitsivoq.

USA-mit peqataasut 70-ngajaassapput taakkunannga amerlasuut tassaassallutik sillimaniarnermik suliallit taakkumi qulakkiissavaat ullup affaa ataatsimiinnermi Hillary Clintonip toqqissisimanissaa.

Issittumi siunnersuisooqatigiit ataatsimiinnissaat aatsaat taama soqutigineqartigisoq Naalakkersuisut siulittaasuata Kuupik Kleistip eqqaamaniarpaa. Siunnersuisooqatigiit 1990-kkut qiteqqunneranni pilersinneqariartorneranniit malinnaaffigiuarsimavai.

Nunanut allanut ministerit Danmarkimiit, Norgemiit, Sverigemiit, Islandimiit, Ruslandimiit USAmiillu tikissapput. Finlandimiut Canadamiullu inatsisartuminnut qinerseqqammeramik ministerimik aallartitsinatik atorfilinnik qaffasissumi inissisimasunik aallartitsiniarput.

Tusagassiortut 60it nunatsinniit,Danmarkimiit nunanillu allaniit ataatsimiinnermut malinnaasussatut nalunaarsimapput.