Hillary malittaalu Hotel Hans Egedemiissapput
Hillary Clinton malitsinilu 37-t Nuummi Hotel Hans Egede-mi unnuisussaapput, tassanilu init quleriiaat pingajuanniittut init tamaasa Fru Clintonip attartorsimavai.
Inummik taama pingaaruteqartigisumik akunnittarfimmi unnuisoqassatillugu aaqqitassamerngit Clintonip piumasarisimasai iluatsilluartut, akunnittarfimmi pisortap, Marianne Rasmussenip oqaatigaa. Taassuma ilanngullugu oqaatigaa USA-miit tikeraartoqarnissartik imatut persuarsiutiginagu, oqarneratut, inuit allat unnuisussat assigalugit taakku sullinneqarput.
Akunnittarfimmi unnuisussani Hillary Clinton kisimi unnuissanngilaq, Sverige-p nunanut allanut tunngasunut ministeria, Carl Bildt aamma Norgep nunanut allanut tunngasunut ministeria, Gahr Støre taamatullu Danmarkimi nunanut allanut tunngasunut ministeri Lene Espersen aamma unnuisussaapput. Taakku tamarmik katillutik 100-sallutik.
- Pisarnitsitut suna tamaat kusanartumik suliarisarparput, kisianni taama pingaaruteqartigisunik inunnik unnuisoqassatilluta suna tamaat misissoqqissaaqqittarparput, Hotel Hans Egede-mi pisortaq, Marianne Rasmussen oqarpoq. Iggavimmi pisortaq aamma ulapeqaaq:
- USA-miit taama pingaaruteqartigisunik tikeraartoqartilluta soorunami nerisassaat kusanartariaqarput, Hotel Hans Egedemi iggaviup ittua, Michael Hansson oqarpoq.
Amerikamit tikeraat unnuinissaminni immikkut ittunik aaqqiisoqassasoq kissaateqarsimapput, tassalu oqarasuaatit amerlineqarnissaannik aamma internettikkut aqqutit amerlineqarnissaannik.
Isumannaallisaanermut tunngasunik amerikamiut kissaateqartut, akunnittarfimmi tusaamasanik allanik unnuisoqarnerani tusaamasat eqqumiitsunik immikkut kissaateqarneq ajortut akunnittarfimmi pisortap oqaatigaa:
- Nalinginnaalluinnartunik soorlu yoghurtinik imermillu ineeqqanut ilioraavugut, soorlu aamma taamaaliortartugut inuinnaat unnuissagaangata, allaanerussutigiinnarpaa inuit tusaamasat unnummut maani unnuissammata.
