Hillary Clintonip ajugaaniarnissaa ajornaatsuinnaanavianngilaq
Præsidentimut qinigassanngortitassarsiorluni naalagaaffimmi Pennsylvaniami unnuaq qinersinermi Hillary Clinton 55 procentinit qinerneqarpoq, unammillertaa Barack Obama 45 procentinit qinerneqartoq. Clintonip ajugaanera ilimagisamit anneruvoq, taamaattorli Obamap amerlanerussuteqareersup ajugaaffiginiarnissaa ajornaatsuinnaanavianngilaq.
Hillary Clintonip ajugaanerminut qinersisartutoqqani, tassa qaqortunik amillit sulisartut qujaffigisariaqarpai, Obamamillu qinersisut tassaanerullutik qinerserngaartussat qernertunillu amillit. Tamanna qinersisunik misissueqqissaarnerni, nutaarsiassaqartitsivimmit AP-mit tv-qarfinnillu arlalinnit ingerlanneqartuni, qinersisartut 2000-it qinersivinni 40-niittut apersornerisigut paasineqarpoq.
Obamap qinigaavallaannginneranut pissutaasorineqarpoq, inuit Pennsylvaniami najugaqartut ajornartorsiornerminni kamannertik pissutigalugu sakkunut upperisarsiornermullu samminerulernerarlugit qanittukkut oqarnera. Misissueqqissaarnermi ersersinneqarpoq, sakkunik pigisallit, naalagiartartut nunaannarmilu najugallit quliugaangata arfinillit Clintonimik qinersisimasut.
